Birligi bekem eldiń, tirligi de kórkem

Tatýlyqty Tý etken elimizde eń birinshi oryndar ulttar men ulystardyń yntymaǵy turatyny belgili. Elbasy da árbir Joldaýynda birliktiń bekemdigin aıtyp, kópke úlgi tirlik jasady. Kúni keshe Memleket basshysy Qasym-Jomart Toqaev ta Assambleıa jumysyna aıryqsha kóńil men basymdyq berile beretinin tilge tıek etti. Bul oraıda Jambyl oblysyndaǵy ózge ulttarynyń yntymaǵy uıysqany kópke aıan, dep jazady Qamshy.kz aqparat agenttigi. Máselen Qordaı aýdany ákimdiginiń baspasóz qyzmetinde ótken brıfıngte Stepnoe aýyldyq okrýginiń ákimi Júsipbek Spanov «Aýyldaǵy ultaralyq kelisimdi nyǵaıtýǵa baǵyttalǵan jumystary» taqyrybynda baıandama jasap, buqaralyq aqparat quraldary ókilderi men áleýmettik jelilerdegi tikeleı efır arqyly túsken suraqtarǵa jaýap berdi.

– Búgingi kúnge Stepnoe aýyldyq okrýginde segizden astam ult ókilderi turady. Etnomádenı birlestikterdiń jumysyn jandandyrý maqsatynda aýyldyq okrýgtiń mádenıet úıinde ultaralyq qarym-qatynasty saqtaý, ulttar birligin nyǵaıtý, etnomádenı birlestikterdiń jumysyn jandandyrý maqsatynda aýyl turǵyndarymen «Ultaralyq qarym-qatynasty nyǵaıtý, ulttar birligin saqtaý» taqyrybynda kezdesýler, dóńgelek ústelder, sporttyq jarystar, «Dostyq festıvalderi» udaıy uıymdastyrylyp turady, – degen aýyl ákimi halyq arasyndaǵy birlik pen biregeılikti saqtaı otyra, keleshek urpaqqa osy qundylyqtardy nasıhattaý, úlgi kórsetý, tárbıeleý maqsatynda qoǵamdyq, aqsaqaldar jáne áıelder keńesteriniń qurylǵanyn aıtty.

Sonymen qatar, joǵaryda atalǵan keńes músheleri tarapynan etnostardyń salt-dástúrin, dinı senimderin, etnıkalyq ustanymdaryn nasıhattaý, biregeılik pen birlikti nyǵaıtý, patrıottyq sezimdi jandandyrý baǵytynda birqatar jumystar júrgizilgenin málim etti. Onyń ishinde, 2019 jyly «Patrıottyq sabaqtar», «Edınstvo nasıı edınstvo naroda», «My drýjboı sılny» taqyryptarynda dóńgelek ústelder, kezdesýler, jıyndar, al bilim berý mekemelerinde jastar arasynda dostyq pen birlikti, ózara súıispenshilikti nasıhattaý maqsatynda ashyq sabaqtar ótkizilipti. Qazirgi tańda Stepnoe aýyldyq okrýgi boıynsha etnosaralyq jáne konfessııaaralyq saladaǵy jaǵdaı turaqty dep sózin qorytyndylady aýyl ákimi.

Iá, yntymaǵy jarasqan aýyldyń ajary kire bersin dep tileımiz.