Jambyldyq jastar júgirýden jarysty

Búginde buqaralyq sportty damytý baǵytynda Jambyl oblysynda aýqymdy tirlikter atqarylýda. Oǵan dálel sońǵy bes jyldyń bederinde elge esigin aıqara ashyp jatqan sport nysandarynyń sany eselep artsa, onda shynyǵyp jatqan turǵyndardyń sany taǵy ósýde. Sońǵy statıstıkalyq málimetke súıensek bıyl buqaralyq sportty janyna serik etken jambyldyqtardyń úlesi 29,9 paıyzdyq mejeni dittep otyr. Bul degenińiz Elbasy Nursultan Ábishuly Nazarbaev belgilegen mindetti áýlıeatalyqtar minsiz oryndap jatyr degen sóz, dep jazady Qamshy.kz aqparat agenttigi. Osynaý ıgiliktiń jalǵasy retinde oblys ákimdigi jastar saıasaty máseleleri men dene shynyqtyrý jáne sport basqarmalarynyń uıymdastyrýymen halyqaralyq stýdentter kúnine oraı Taraz qalasynda sporttyq marafon ótti. «Stýdent FEST» ataýymen túndigin túrgen jarysqa joǵary jáne arnaýy oqý oryndarynan 200 - den asa bilimger qatysyp, ózara baq synady.

Sporttyq sharany dene shynyqtyrý jáne sport basqarmasynyń basshysy Nurbol Júnisbekov ashyp, halyqaralyq stedentter kúnimen kópshilikti quttyqtaı kele, jarysqa qatysýshylarǵa sáttilik tiledi . Budan keıin dodanyń bas tóreshisi Tahır Mamashaev marafonnyń tárti men erejesin túsindirip ótti.

Belgilengen tártip boıynsha marafonshylarǵa «Nursultan Nazarbaev» atyndaǵy alańnan bastap, QR Tuńǵysh Prezıdenti saıabaǵyna deıin júgirip ótý talaby qoıyldy.

Jalpy marafonǵa qatysýshylardyń qarasy qalyń boldy. Jáne júgirýshilerdiń arasynda jastardyń úlesi basym bolǵany qýantty. Sondaı-aq buqaralyq sportty janyna serik etken aǵa býyn úlkenderdiń de marafonnan boı kórsetýi keıingilerge úlgi-ónege bolǵany haq.

Jarystyń qorytyndysynda M.H.Dýlatı atyndaǵy Taraz memlekettik ýnıversıtetiniń stýdenti Ilham Erkebaev máre syzyǵyn birinshi bolyp kesip ótse TarMÝ –dyń stýdenti Qazym Jamalov júldeli ekinshi orynǵa taban tiredi. Úzdik úshtikten atalǵan ýnıversıtettiń stýdenti Rýfına Fazylhanova kórindi.

Osylaısha júldeli úsh oryndy da TarMÝ-dyń stýdentteri ıelenip, talaıdy tańqaldyrdy.

Árıne mundaı buqaralyq sporttyq sharalar turǵyndardy salamatty ómir saltyn qalyptastyrýǵa úndeıtini aqıqat. Oǵan qosa, úlken býyn aǵalardyń da sportty janyna serik etip, «Taraz-Arena» sport kesheninde shynyǵyp, saıabaqtar men skverlerde júgirip júrgenin kóz kórýde. Bul birer jylda tutas tarazdyqtar men alystaǵy aýyl aǵaıyndary da sporty ómiriniń bir bóligi dep kóredi degen sóz. Endeshe sol kúndi kórýdi jazsyn.