Taraz qalasynyń ákimi Qaırat Dosaev stýdenttermen kezdesti

Taraz qalasynyń ákimi Qaırat Dosaev Jastar jyly aıasynda Jambyl polıtehnıkalyq joǵary kolledjiniń stýdentterimen kezdesti. Erkin formatta ótkizilgen bul kezdesýde shahar basshysy stýdenttermen jastar tárbıesi, mamandyq tańdaý, adal eńbek etýden bastap qaladaǵy stýdentterdiń jol júrý aqysy, ǵylymı izdenisi, bıznes ıdeıalary syndy san túrli máselelerge qatysty oılaryn ortaǵa salyp, olardyń talap-tilekteri men usynysyna qulaq túrdi, dep jazady Qamshy.kz aqparat agenttigi. 

Kezdesýdi Taraz qalalyq jastar resýrstyq ortalyǵynyń dırektory Nurlan Qanatov ashyp júrgizip otyrdy. Keler sátte sóz tizginin alǵan Taraz qalasynyń ákimi bul kezdesýdiń jastardyń jaı-kúıimen tanysyp, olardyń utymdy usynystaryn bilý maqsatynda uıymdastyrylyp otyrǵanyn jetkizdi. Ile shala stýdentter de shahar basshysyna kókeılerinde júrgen saýaldaryn qoıyp, tushymdy jaýap aldy. Máselen Jambyl polıtehnıkalyq joǵary kolledjiniń 2 kýrs stýdenti Ramazan Slan qala ákiminen balalarynyń memlekettik qyzmetke barýǵa qatysty kózqarasyn surady.

–О́zim alǵashqy eńbek jolyn bastap, qyzmetke aralasqan sátten memlekettik qyzmetke ańsarym aýdy. 1995 jyldan beri memlekettik qyzmetten kele jatyrmyn. Uldarym jolymdy jalǵaımyn dese esh qarsylyq joq. Alaıda tuńǵyshym á-degennen qalaýy jeke kásipkerlik ekenin aıtty, –dedi Qaırat Áskerbekuly.

Kezdesýge jınalǵan jastarǵa qarata aıtylǵan taǵy bir sózinde Taraz qalasynyń ákimi olarǵa kúndelikti sportpen shuǵyldanyp, kórkem ádebıet oqýǵa keńes berdi. Al stýdentterdiń jol júrý bıletine qatysty saýalyna jaýap qatqan Qaırat Áskerbekuly bul máseleni retteýdiń ártúrli tetikteriniń qarastyrylyp jatqanyn tilge tıek etti.

–Rasynda stýdentterdiń jol júrý bıleti júıesin engizý óte ózekti másele. Ári bul qaladaǵy joǵary jáne arnaýly oqý oryndarynda oqıtyn 40 myńǵa jýyq stýdentke úlken kómek bolar edi. Dál osy máselege qatysty shahardaǵy jolaýshylar tasymalymen aınalysatyn 10 kompanııa ókilderiniń basyn qostym. Alaıda ortaq sheshimge kele almaı otyrmyz. Olar bul máseleni jolaqynyń baǵasyn kóterý arqyly sheshýdi usyndy. Sonyń esebinen olar jolaýshylar tasymaldaý isiniń sapasyn arttyrý, avtoparkterdi jańǵyrtý, kásibı júrgizýshilerdi qyzmetke tartý múmkin bolatyndyǵyn aıtady. Menińshe qaladaǵy jolaýshylar tasymaly salasyn jetildirýdiń jańa júıesi qajet Jáne sol júıeni qalyptastyrý, qoldanysqa engizý arqyly mundaǵy ótkir máselelerdiń sheshimin tabamyz,–dedi Q.Dosaev.

Kezdesý sońynda stýdentter shahar jastarynyń máselesine qulaq túrip, olardyń utymdy usynystarymen tyń ıdeıalaryn júzege asyrýǵa qoldaý bildirýge daıyn ekendigin jetkizgen Taraz qalasy ákimine alǵystaryn bildirip, onymen estelik sýretke tústi.