09 Qazan, 2019 Aımaqtar

Basshylar demalys bólmeleri men keń kabınetterin bosatyp jatyr

Jambyl oblysynda mekeme basshylary keń jumys kabınetterin shaǵyn kólemdegi bólmelerge aýystyryp jatyr. Halyqqa qoljetimdi bola túsý úshin óz keńsesiniń birinshi qabatyna qonys aýdarǵan basshylar da tabylady. Esesine olardan bosaǵan kabınetter ózgede tıimdi maqsattarǵa paıdalanýda. Bul jumystar «Jambyl adaldyq alańy» joba aıasynda júzege asyrylýda, dep jazady Qamshy.kz aqparat agenttigi. 

Jobalyq ofıs qyzmetkerlerimen eń áýeli oblystaǵy 440 mektepke zerdeleý jumystary júrgizildi. Sondaı-aq bul baǵyttaǵy jumystar jergilikti atqarýshy organdardyń 353 basshysynyń kabınetin qamtydy.

–Mektep basshylarynyń kabınetterin bilim ordasynyń birinshi qabatyna jáne aýdany úlken emes bólmelerge almastyryldy. Máselen 35-50 sharshy metr aralyqtaǵy alańdarda jumys jasap otyrǵan 74 mektep dırektorynyń kabınetteri 11-20 sharshy metrlik bólmelerge aýystyryldy. Nátıjesinde mektep ǵımaratyndaǵy 866 sharshy metr alań bosatyldy. Al ol alańǵa mektep oqýshylaryna qajetti robototehnıka, sýret jáne aǵylshyn tili synyptary ashyldy.

Jergilikti atqarýshy organ basshylarynyń 353 kabınetine júrgizilgen monıtorıng kezinde olardyń 239 sharshy metr bolatyn demalys bólmeleri bar kabınetterge ıelik etip otyrǵan anyqtaldy. Sáıkesinshe 17 memlekettik organ basshysynyń demalys bólmeleriniń paıdalaný maqsattary ózgertildi. Munda endi atalǵan mekemeniń muraǵaty, qoımasy ornalaspaq. Halyqqa meılinshe jaqyn bolýy, ári aryz-shaǵymdaryn ala kelgen turǵyndarǵa ońtaıly jaǵdaı jasaý maqsatynda oblystaǵy 133 basshynyń kabıneti 1-qabatqa kóshirildi, –deıdi Qazaqstan Respýblıkasy Sybaılas jemqorlyqqa qarsy is-qımyl agenttiginiń Jambyl oblysy boıynsha departament basshysynyń birinshi orynbasary Ravıl Tólebaev

«Jambyl adaldyq alańy» jobasymen júrgizilgen túgendeý jumystary kezinde buǵan deıin kásipkerlik sýbektilerge tıesili nysandarda jaıǵasqan Qordaı aýdany ákimdiginiń jer qatynastary, dene shynyqtyrý jáne sport, aýyl sharýashylyǵy, óndiris jáne kásipkerlik bólimderi, QR EM Atomdyq jáne energetıkalyq qadaǵalaý men baqylaý komıtetiniń Jambyl oblysy boıynsha aýmaqtyq departamenti syndy 5 memlekettik organnyń keńsesi kommýnaldyq menshiktegi ǵımaratqa ornalastyryldy. Dál osy jumystyń nátıjesinde atalǵan mekemelermen tólengen jaldaý aqysy esebinen 16 mıllıon teńgeden asa memleket qarjysy únemdeldi.

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir