Qadaǵa men qaýipsizdik kúsheıe tústi

Memleket basshysy Qasym-Jomart Toqaev halyqqa arnaǵan Joldaýynda quqyq salasyna aıryqsha kóńil bóle kele, birqatar mamandyq ıeleriniń jumysyna kóńil bólý qajettigin basa aıtqan bolatyn. Sonyń biri – tótenshe jaǵdaılar salasynyń salalyq baǵyttary. Osyǵan oraı Jambyl oblysy Shý aýdanynda sala mamandaryn qoldaý maqsatynda jańa beket ashyldy, dep jazady Qamshy.kz aqparat agenttigi. Naqtyraq aıtsaq, Shý aýdany ákimdiginiń 2019 jylǵy 15 shildedegi №340 jarlyǵyna sáıkes eldi mekendegi eń shalǵaı aımaqta ornalasqan Shoqpar aýyldyq okrýginde jańa órt sóndirý beketi quryldy. Saltanatty sharaǵa aýdan ákiminiń orynbasary Nurlan Jaqsybaev, aýdandyq tótenshe jaǵdaılar bólimi basshysynyń mindetin atqarýshy Danııar Janqulıev, Shoqpar aýyldyq okrýginiń ákimi Rashıd Shońbaev, Shoqpar aýyldyq aqsaqaldar alqasynyń tóraǵasy Quttybaı Shalbaev, eńbek ardageri Tóleýhan Shaımerdenov jáne taǵy basqalary qatysyp, aýyldyqtardy qýanyshtarymen quttyqtap, órt sóndirý beketi qyzmetkerlerine tabys tiledi.

Atap óterligi, okrýg ákimi beketke bólek jeke ǵımarat bergen, onda kezekshi quram otyrady. Al onyń qasynda Shý jol dıstansasy yqpalymen taǵy qosymsha oryn ornalasqan, ishinen Jambyl oblystyq tótenshe jaǵdaılar departamentiniń «О́rt qutqarý qyzmeti» memlekettik mekemesi tarapynan bólingen órt sóndirý kólikterin kórýge bolady. Beket personaly jeti shtatty birlikten turady: 4 órt sóndirýshi, 3 kólik júrgizýshi. Ony kútip ustaýǵa jergilikti bıýdjetten bıyl 2 mıllıon 188 myń teńge bólingen.

Saltanatty shara barysynda, Tóle bı aýylyndaǵy №19 órt sóndirý beketiniń qyzmetkerleri jańa bekettiń órt sóndirýshilerimen birge praktıkalyq jattyǵýlar jasady.

Jańa bekettiń ashylýy sońǵy ýaqyttaǵy jaǵymdy jańalyq boldy. Sonymen qatar, onyń Shoqpar aýyldyq okrýgi úshin mańyzy erekshe. Sebebi, órt sharpý jaǵdaıy munda kóp kezdesedi. Endi atalmysh okrýg órtpen ýaqtyly kúrese alady dep senimdi aıtýǵa bolady.

Osyndaı órt sóndirý beketteri aldaǵy ýaqytta ózge aýdandardan da ashylady degenge senim mol. Sebebi Shý aýdanynan bólek, irgeles jatqan Moıynqum aýdanynda da tilsiz jaý máselesi talaı jyldan beri qos búıirden qysyp, sala mamandaryn kúndiz kúlkiden, túnde uıqydan aıyrýda. Sondyqtan kórshiles aýdandarda shýlyqtardan úlgi alsa eken deımiz.