Jaıylymdyq jerler kezeń kezeńimen sheshiledi

Jambyl oblysy Shý aýdanyna qarasty 36 eldi mekenniń turǵyndarymen kezdesken aýdan ákimi Jarylqasyn Ábdiǵaparuly búginde buqaranyń tynysymen jiti tanys. Qara halyqtyń qamyna qajetti sharalardan da habardar. Sondyqtan ákim buqaramen júzdesýdi bir sátke bolsyn keıingi ysyryp qoımaı, árdaıym el ishinde júr, dep jazady Qamshy.kz aqparat agenttigi. Máselen Alǵa aýylynda bolǵan ákimi birinshi kezekte aýyl turǵyndary alańdap otyrǵan bilim oshaǵy týraly sóz qozǵap, bul másele qaralý ústinde ekendigin, aldaǵy on kúnde merdiger uıym anyqtalsa, kelisimshart jasalyp, qujattar rettelip, jańa mekteptiń qurylysy bastalatyndyǵyn, kelesi oqý jylynda oqýshylar 300 oryndyq jańa mektepte bilim alatyndyǵyn jetkizdi. Al, eski mektepti bala sanynyń qajettiligine qaraı balabaqshaǵa aınaldyrý kózdelgen. Ekinshiden, aýyl turǵyndary úshin ózekti problemanyń biri – mádenıet úıi boıynsha joǵary jaqtan kelisim bergen jaǵdaıda ǵana JSQ daıyndaýǵa kirisip, ol saraptamadan ótip jatsa, jańa mádenıet úıin soǵýǵa, alaıda oǵan deıin eski mekteptiń jóndelý barysyna qaraı yńǵaılastyrylǵan mádenıet úıin salýǵa bolatyndyǵyn málimdese, jol jóndeý máselesi tóńireginde aýyldaǵy jóndeýdi qajet etetin kóshelerdiń jobalyq smetalyq qujattamasy daıyn turǵandyǵyn, biraq aýyl turǵyndary alǵa tartyp otyrǵan úsh kósheni birden asfalttaýǵa ýáde bere almaıtynyn, bul qarajat kózine qaraı kezekpen jóndeletinin aıtty. Jaıylymdyq jerdiń jetispeýi de aýyl turǵyndary úshin ózekti. Aýdan basshysy bul máseleniń sheshimin tabýdyń eki jolyn usyndy. Birinshiden, kóp maly bar otbasy ıelerin aýyl syrtyndaǵy maldy aýylǵa qonystandyrý. Ekinshiden, jaıylymdyq jerdi tıimdi paıdalaný úshin jeke menshiktegi bos jatqan jerlerdi memleketke qaıtarý. Bul másele respýblıka deńgeıinde de qolǵa alynýda. Sol sebepten, aýyl ákimine osy baǵytta jumys júrgizý qajettigin eskertti. Kelesi kezekte tozǵan elektr baǵandarynyń saldarynan jaryq jıi óshetindigi de kóterilgen eken. Bul baǵytta oblystaǵy jeke menshikti «Jambyl-jaryq» mekemesi jumys júrgizip otyrǵandyqtan, ózara jumystar júrgizilip jatqandyǵy, alaıda atalmysh mekemeniń kezegi bizdiń aýdanǵa jetkenshe aýdan ákimdiginiń turǵyn úı-kommýnaldy sharýashylyǵy, jolaýshylar kóligi jáne avtomobıl joldary bólimimen birlesip, oń sheshimin qarastyrý qolǵa alynatyndyǵy aıtyldy.

Sonymen qatar, aýdan basshysy aýyldaǵy densaýlyq saqtaý salasynyń jaı-kúıin surady. Bul jóninde aýdandyq ortalyq aýrýhana basshysy A.Muqataev jaýap berip, aýylda dáriger joqtyǵyn, turǵyndar qońyraý shalǵan kezde Shý qalasyndaǵy jedel járdem kelip qyzmet kórsetetindigin, tórt dárigermen kelisimshart jasalǵandyǵyn, olardyń bireýi aýyldaǵy qyzmetke kiriskenge deıin aýdandyq emhanadan dáriger Núrken Altaev ýaqytsha qyzmet kórsetetindigin jetkizdi. Al, okrýg ákimi aýylda sý, kógildir otyn máseleleri sheshimin tapqandyǵyn, alaıda vetpýnkt qajettigin jáne úlken jol jasalyp bitken soń, onyń boıynan kásipkerlik maqsatqa jer aýyl turǵyndaryna ǵana berilse degen usynysyn, Kúıgen jáne Aqshaly kanaldaryn tazalaý qajettigin alǵa tartty. Atalǵan máseleler boıynsha aýdan ákimi J.Aıtaqov qajetti sharalar qolǵa alynatyndyǵyna bek sendirdi.