Sózden iske kóshetin kez keldi

Áýlıeatanyń ákimderi búginde buqaramen berik baılanys ornatýdyń shynaıy úlgisin kórsetýde. Oblys ákimi Asqar Myrzahmetovtiń ózi tikeleı bastap el arasynda júrse, aýdan ákimderi de ıgi istiń jalǵasy retinde jurtshylyqpen júzdesýde. Mine sondaı kópke úlgi bolar tirliktiń bir kórinisin Shý aýdanynyń ákimi Jarylqasyn Aıtaqov kórsetýde, dep jazady Qamshy.kz aqparat agenttigi. Jalpy Jarylqasyn Aıtaqov shyraıly Shý óńirinen kelgeli jumys kúnin keńsede emes, el ishinde ótkizýde. Bul joly aýdan basshysy Jaısan aýylynyń turǵyndarymen kezdesti. Áýeli aýdan ákimi jergilikti halyqqa kezdesýdiń maqsatyn túsindirip ótken soń, eldi mekende qandaı jumystar atqarylǵandyǵy jáne shaǵyn aýyldaǵy ózekti máseleler jóninde baıandap berýi úshin Alǵa aýyldyq okrýginiń ákimi B.Esbergenovke sóz kezegin berdi. Okrýg ákimin muqııat tyńdaǵan soń ózi sóz aldy.

-Men sizderdiń aýyldaryńyzdaǵy problemalarmen tanystym. Iá, birinshi kezekte jańa mektep qurylysy máselesin sheshý qajet. Qazir biz kezdesý ótkizip otyrǵan mektep ǵımaratynyń tozyǵy jetkeni birden baıqalyp tur. Tar jáne beıimdelmegen. Jańa mekteptiń qurylysy kelesi jyldyń josparynda bar. Al, eski ǵımaratty balabaqsha, bir bóligin klýbqa aınaldyrýǵa bolady. Bul máselelerdiń barlyǵy ýaqyt enshisinde. Jalpy, sizderdiń shaǵyn aýyldaryńyzǵa kútim jasalǵandyǵy kórinip tur. Sizderdiń endigi mindetterińiz – aýyldy osy qalpynda saqtaý, al bizdiń mindetimiz – oryn alǵan máselelerdiń sheshimin tabýǵa kómektesý,-dep sózin aıaqtady Jarylqasyn Ábdiǵaparuly.

Sonymen qatar, jıyn barysynda qatysýshylar tarapynan kóterilgen suraqtarǵa aýdan ákimi tıisti bólim jáne mekeme basshylarymen birlese otyryp, tushymdy jaýaptar berdi.

Keńestik kezeńde bolystyń mindeti kolhozdaǵy maldy sanap, el ishindegi dúnıeni ortalyq aparatqa jetkizip otyrý bolsa, el egemendigin alǵaly berý buqara ákimdermen tikeleı sóılesip, ótinish-tilekterin jetkizý quqyǵyna ıe boldy. Prezıdent tilge tıek etip júrgen jurtshylyqpen keri baılanys degen osy. Eń basty mindet – ol turǵyndardyń turmysyn túzep, áleýmettiń áleýetin arttyrý. Bul senim údesinen Shý aýdanynyń ákimi Jarylqasyn Aıtaqov ázirge shyǵyp jatqandaı. Dese de biz aýdan basshysynan aldaǵy ýaqytta da osyndaı janǵa jylý bererlik jumystardy kútemiz.