Almatydaǵy Terekti eldi mekeniniń turǵyndary eski ǵımarat pen oıdym-oıdym joldardan ábden zárezap bolǵanyn aıtyp shý shyǵardy dep habarlaıdy Qamshy.kz aqparat agenttigi KTK telearnasyna silteme jasap.
Olar qurylysy qıraǵan nysan jekemenshikke ótkeli óńsheń buzaqylar men qańǵybastardyń mekenine aınaldy dep otyr. Al ǵımarat ıesi belgili akter eken. Atalmysh nysannyń kesirinen mektepke baratyn balalarynyń ári-beri ótýi qıyndaǵan.
Al jol máselesiniń jóni bir bólek. Aýyl jurty bul jaǵdaıdyń jylda qaıtalanatynyna jáne máseleniń túbegeıli sheshilmeı kele jatqanyna qapaly. Jylý júıesi ǵımaratynyń jeke menshikke ótkenine 20 jyl bolǵan. Ortalyq kóshede ornalasqan nysan búginde qańyrap qoqys alańyna aınalypty. Tipti munda eki jyl buryn adam ólimi bolyp, bir qyz óz-ózine qol salǵan deıdi jurt. Al qystyń kúni bul jerdi qańǵybastar panalaıdy. Qorshaýy joq qaraýsyz keshen mańynan kúnde mektepke qatynaıtyn balalaryna alańdaǵan turǵyndar keıde nómirsiz kólikterdiń de osynda kelip turaqtaıtynyn aıtady.
Jurttyń aıtýynsha, qıraǵan keshen belgili akterge tıesili eken. Kórshiler onyń birneshe ret nysanǵa kelip tekserip ketkenin de kóripti. Aýyl halqynyń bas aýryna aınalǵan másele bul ǵana emes. Jyl saıyn joldyń jaıy da jyrǵa aınalǵan. Tipti jedel járdem kólikteri kóshege kire almaı ketken kúnder de bolypty.
Atqaminerlerdi múldem kórmeımiz degen turǵyndar búginge deıin tek qaǵaz júzinde ǵana jaýap alǵanyn aıtady. Bul máselege jaýaptylardyń da óz aıtary bar. Olar eski nysannyń máselesin jaqynda sheship beretinine ýáde berip, bul jerdiń halyq ártisine tıesili ekenin rastady.
Jolǵa jaýapty mamandar qazir smetalyq qujat jasalyp jatqanyn alǵa tartty. Munda sý jáne káriz júıesi júrgizilmeıinshe, jol jóndelmeıdi dep otyr. Ol 2020-2021 jyldarǵa josparlanǵan.
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir