Almatyda alǵashqy qalalyq hakatonnyń qorytyndysy shyǵaryldy

5-6 qazanda Q-Lab qalalyq jobalar Zerthanasynda aqyldy jobalardy jasaýshylardyń alǵashqy qalalyq marafony ótti. Ideıany prototıpke aınaldyrý úshin qatysýshylarǵa 24 saǵat berildi. Qoıylǵan mindet – jobaǵa buryn qatysqandardyń usynystaryn jalǵastyrmaı ári qaıtalamaı jańa ıdeıasy bar prototıpti birden jasaý jáne iske asyrý, dep jazady qalalyq ákimdiktiń baspasóz qyzmeti"

Hakatondy ashqan Almaty ákimi Baqytjan Saǵyntaev megapolıstiń tynys-tirshiligin qamtamasyz etetin barlyq salalarǵa jańa ári tıimdi sheshimder qajet ekenin aıtty.

«Perspektıvaly, zııatkerlik ázirlemeler men taldamalardy usynǵan komandalarǵa qoldaý kórsetiledi, óıtkeni olardyń usynystary qalanyń tynys-tirshiligin qamtamasyz etýde praktıka júzinde qoldanylady. Aqyldy marafondy biz jyl saıyn ótkizemiz, aýqymyn keńeıtemiz jáne olardy paıdalanatyn salalardy ulǵaıtamyz, bul iske kreatorlar men ázirleýshilerdi keńinen tartatyn bolamyz», – dedi B. Saǵyntaev.

Almaty SmartCity Challenge hakatonynyń júldelik qory 3 mln teńgeni jarys jeńimpazdary atanǵan úsh komanda ózara bólisti: HCK50 («Salem Tourist» jobasy – 1,5 mln teńge), GGG («Smart bin» – 1 mln teńge) jáne Mbionics («Aqyldy turaq» – 500 myń teńge).

Sharaǵa qoldaý kórsetken demeýshilerdiń «Kasperskııdiń Zerthanasy» AQ, «Qazteleport» AQ arnaıy syılyqtarymen jańa ári kreatıvti ıdeıalary úshin 9 komanda marapattaldy. Hakatonǵa qatysýshylardyń barlyǵy ataýly sertıfıkattar aldy.

Týrısterge arnalǵan «Salem Tourist» mobıldi qosymshasy arqyly qalamyzdyń óte qyzyq jerleri jáne kórneki oryndary, olarǵa qalaı barýǵa bolatyndyǵy, reıtıngi jáne qalalyqtardyń pikiri týraly aqparattardy alýǵa bolady. Bul jobany ázirlegender qosymshanyń Almatynyń týrıstik tartymdylyǵyn arttyryp, týrısterge barynsha jaıly jaǵdaılardy jasaıtyndyǵyn aıtty.

«Smart bin» jobasynyń avtorlary datchıkter arqyly qalanyń qoqys tolǵan konteınerleri birden kózge túsetinin jetkizdi. Olar konteınerlerdiń tez tolýy jáne tazarýy logıstıkany ońtaılandyrýǵa, qansha qoqys jınaıtyn mashınalar men konteınerlerdiń qajet ekenin esepteýge, baǵytty anyqtaýǵa, qoqys kólikteriniń maıyn únemdeýge, tehnıka men joldyń tozýyn azaıtýǵa jáne qyzmetkerlerdiń jumys ýaqytyn qysqartýǵa múmkindik beretinin aıtty.

Mbionics komandasynyń «Aqyldy qala» jobasyn jasaýshylar jedel monıtorıngtiń Almatynyń bos turaqtarynda kólikti ornalastyrý prosessin basqaratynyn aıtty. Bul joba qalanyń kólik turaǵy keńistigin jasqartýmen qatar qala bıýdjetine túsetin qarjyny ashyq baqylaýdy qamtamasyz etedi.

Hakatonǵa qatysýshylardyń barlyǵy qalany damytýǵa arnalǵan 30-dan astam joba ázirlegen bolatyn. Qatysýshylar turmystyq qoqystardy óńdeıtin ferma, qalanyń jasyl jelegin sýaratyn «aqyldy» avtosýshashqysh, monıtorıng júıesi jáne bos kólik turaǵyn izdeý, qala qaýipsizdigin taldaý, júktemeni azaıtý jáne basqa da jobalardy quramyna «Kasperskııdiń Zerthanasy» AQ, «Qazteleport» AQ, «ATP» AKQ(Tech Garden), «Aqparattyq tehnologııanyń Halyqaralyq ýnıversıteti» AQ jáne ál-Farabı atyndaǵy QazUÝ-niń Saraptama jáne málimetterdi óńdeý ortalyǵynyń ókilderi engen saraptama jıýrıiniń qaraýyna usyndy.