Qoǵamnyń mindeti – muǵalimniń mártebesin kóterý

Baqytjan Saǵyntaev óskeleń jas urpaqtyń boıyna ómirsheń qundylyqtardy qalyptastyrýda muǵalimniń mańyzdy ról atqaratynyn atap ótti, dep jazady almaty.gov.kz saıty.

«Búgingi ómirde muǵalim tek kásibı saýatty bolýmen qatar, bilim berýdiń jańa quraldary men ádisterin meńgerýi, qoǵamda bolyp jatqan ózgeristerdi jete sezinýi tıis. Búgingi kúni balalardy óz betterinshe oılaı bilýge, sheshim qabyldaýǵa jáne óz tańdaýy úshin jaýapkershilikti moınyna alýǵa úıretý qajet. Sizder kún saıyn olarǵa jańa Qazaqstannyń laıyqty azamattary bolýǵa kómektesip kelesizder», – dep atap ótti qala ákimi.

Ol óziniń sózinde qoǵamnyń mindeti – muǵalimniń bedelin tý bıikke kóterý ekenin qadap aıtty.

«Biz muǵalimge balalarymyzdy, ıaǵnı bolashaǵymyzdy senip tapsyramyz. Elimizdiń bolashaǵy muǵalimge tikeleı baılanysty», – dedi B.Saǵyntaev.

B.Saǵyntaevtyń tapsyrmasy boıynsha jas muǵalimderge qoldaý kórsetilýde. Bıylǵy jyly 634 jas muǵalim 50,5 myń teńge kóleminde birretik materıaldyq kómek aldy. Onyń jalpy somasy 32 mln. teńge.

Budan ózge, 2020 jyldan bastap megapolıstiń úzdik muǵalimderi úshin Almaty qalasy ákiminiń arnaıy granty engizilmek. Úzdik pedagogıkalyq ujym dástúri jalǵasyn tabady. Búgin 10 jeńimpaz mektepterdiń myńnan astam ustazdary aqshalaı syılyqtarǵa ıe boldy.

Saltanatty shara barysynda «Úzdik pedagogıkalyq ujym» baıqaýynyń qorytyndysy shyǵaryldy. № 182 mekteptiń muǵalimderi Gran-prıdi al, birinshi oryndy № 169 mektep-lıseıi men № 174 mektep-gımnazııasy ıelendi. Úsh ekinshi oryndy № 177 jalpy bilim beretin mektep, № 126 arnaıy lıseı, № 115 jalpy bilim beretin mektep aldy. Úshinshi oryndy № 110 mektep-gımnazııa, №79 gımnazııa, № 198 jalpy bilim beretin mektep pen № 62 gımnazııasy ózara bólisti.

«Úzdik pedagog» respýblıkalyq konkýrsynyń jeńimpazdary: №178 lıseıdiń qazaq tili men ádebıeti pániniń muǵalimi Qanat Qaıyrbaı, Y. Altynsarın atyndaǵy № 159 gımnazııasynyń bastaýysh synyp muǵalimi Janar Qusaıynova, № 148 mektep-gımnazııasynyń bastaýysh synyp muǵalimi Nazıgúl Mergenbaeva men Indýstrııa jáne týrızm kolledjiniń arnaıy pánder oqytýshysy Erasyl Mamyrbekov.

Budan ózge, bilim salasynyń birqatar qyzmetkerleri «Ybyraı Altynsarın» jáne «QR Qurmetti bilim qyzmetkeri» tósbelgilerimen marapattaldy.