Jańa járdemaqy: on balasy bar otbasylar 100 myń teńge me, álde 73 myń teńge ala ma?

Eńbek jáne halyqty áleýmettik qorǵaý mınıstri Birjan Nurymbetov jeti jáne odan kóp balasy bar otbasylarǵa aı saıyn qansha teńge tólenetinin naqtylady, dep habarlaıdy Qamshy.kz aqparat agenttigi Sputnik Qazaqstan saıtyna silteme jasap.

Jýrnalıster eńbek mınıstrinen on balasy bar otbasylar 100 myń teńge me, álde 73 myń teńge ala ma dep surady.

"Bıýdjet múmkindigin eskerip, ázirge jeti jáne odan kóp balasy bar otbasylar úshin 73 myń teńgemen shektelip otyrmyz", - dedi Nurymbetov májilis kýlýarynda.

Aıtýynsha, qazir respýblıkada 343 myń kópbalaly otbasy bar.

"Sonyń ishinde úsh balasy barlar – 27%, 4 balaly otbasylar – 61%, bes balasy bar januıalar – 9%, 7 jáne odan kóp balasy barlar 3%-i qurap otyr. Sondyqtan biz osyny jáne bıýdjettik múmkindikterdi eskerdik", - dep túsindirdi mınıstr.

Ol eger usynys parlamentten qoldaý taýyp, zań jobasy qabyldansa, kópbalaly otbasylarǵa memlekettik járdemaqy 2020 jyldyń 1 qańtarynan tólenetinin jetkizdi.

Memlekettik járdemaqy kámeletke tolmaǵan tórt jáne odan kóp nemese 23 jasqa deıingi kúndizgi bólimde oqıtyn stýdentteri bar kópbalaly otbasylarǵa tabysyna qaramastan tólenedi.

Buǵan deıin eńbek mınıstrligi memlekettik járdemaqynyń mólsheri bala sanyna qaraı saralanatynyn, ár balaǵa ortasha eseppen 10-11 myń teńge tólenetinin habarlaǵan bolatyn.

Budan bólek, eger kópbalaly otbasy tabysyna qaraı turmysy tómen otbasy sanatyna jatsa, onda bul januıaǵa ataýly áleýmettik kómek pen balalarǵa kepildi áleýmettik paket te taǵaıyndalady.