Semeıge Japonııanyń "Soka Gakkai International "(SGI) bitimgershilik uıymynyń ókilderi keldi

SGI atqarýshy dırektory Hırosýgý Terasakı aǵymdaǵy jyly Semeı polıgonyndaǵy ıadrolyq synaqtardyń toqtatylýyna 30 jyl jáne Ortalyq Azııadaǵy Iаdrolyq qarýdan azat aımaq týraly sharttyń kúshine enýine 10 jyl tolǵanyn atap ótti. Bul eki aıtýly kúnge elordada ótetin halyqaralyq kórme arnalǵan. Kórme ashylar aldynda japon delegasııasy Kýrchatov jáne Semeı qalalarynda boldy.

– Kórmede ıadrolyq jarylystardyń zardaptary, qıraýlar men adam qurbandary, radıoaktıvti zalaldaný aımaqtary, Hırosıma men Nagasakıdiń tarıhy, ıadrolyq qarýsyzdaný úshin qozǵalys kóshbasshylarynyń jetistikterine jáne árıne, Qazaqstan Respýblıkasynyń Tuńǵysh Prezıdenti Nursultan Nazarbaevtyń Semeı synaq polıgonyn jabý týraly tarıhı sheshimine arnalǵan stendter jasaǵan ǵylymı jańalyqtar men progressıvti ıdeıalar kórinis tappaq, – dedi Hırosýgý Terasakı. – Qazaqstanda qurylǵan "Nevada – Semeı" qozǵalysy ıadrolyq synaqtardy toqtatýǵa jáne ıadrolyq qarýdyń ózin joıýǵa baǵyttalǵan kúsh-jigerdiń aýqymy boıynsha jahandyq deńgeıge shyqqany belgili. Bul qozǵalys, etnıkalyq jáne áleýmettik aıyrmashylyqtarǵa qaramastan,  adamdardy biriktirgen, adamzatty uǵynýǵa shaqyratyn qýatty kúshke aınaldy.

Alǵash ret synaqqa tyıym salý, arsenaldardy qysqartý boıynsha kúsh-jigerge arnalǵan jyljymaly kórme Hırosıma qalasynda 2012 jyldyń tamyz aıynda kórsetildi. 2013 jyldyń sáýir aıynda ol Jenevadaǵy BUU Eýropalyq shtab-páterinde jáne ıadrolyq qarýsyzdaný jónindegi konferensııalarda, túrli elderdiń oqý oryndarynda kórsetildi. Ekspozısııa álemniń 20 eliniń 90 qalasynda boldy.

Kýrchatov qalasynda japon delegasııasy "Opytnoe pole" alańynda, Ulttyq ıadrolyq ortalyqtyń murajaıynda boldy. Semeıde halyqaralyq uıym ókilderi ıadrolyq medısına jáne onkologııa ortalyǵynyń, medısınalyq ýnıversıtettiń jumysymen tanysyp, Beıbitshilik aralyna bardy.

Hırosýgý Terasakıdiń aıtýynsha, kelesi jyly jyljymaly kórme Semeıde ótedi.