Qordaıda mádenıet mekemeleriniń sany artýda

Qazaqstan Respýblıkasynyń Prezıdenti Qasym-Jomart Toqaevtyń «Syndarly qoǵamdyq dıalog-Qazaqstan turaqtylyǵy men órkendeýiniń negizi» atty Qazaqstan halqyna Joldaýy mádenıet salasynyń qyzmetkerlerin de jelpintip tastady. О́ıtkeni, jyldyń basty qujatynda atalmysh salanyń ókilderin qoldaýǵa qatysty naqty tapsyrmalar berildi.

Memleket basshysy: «Biz mádenıet salasynda jumys isteıtin azamattarǵa jetkilikti túrde kóńil bólmeı otyrmyz.

Bul – eń aldymen, kitaphana, mýzeı, teatr qyzmetkerlerine qatysty másele.

Olardyń eńbekaqysy sońǵy jyldary múlde kóbeıgen joq.

Sonyń saldarynan mádenıet qyzmetkerleri, ásirese jas mamandar jeńildigi bar turǵyn úı baǵdarlamalaryna qatysa almaıdy.

Mundaı ahýal osy kásiptiń bedelin túsirip, laıyqty kadrlardyń tapshylyǵy aıqyn sezilýde.

Kelesi jyldan bastap Úkimet mádenıet qyzmetkerleriniń eńbekaqysyn kóbeıtýi tıis.

Sondaı-aq, bilim berý jáne densaýlyq saqtaý salalaryndaǵy mindetti áleýmettik jeńildikter mádenıet salasynyń ókilderine de berilýi kerek» deı kele bul baǵyttaǵy birqatar mindetterdi aıqyndap berdi.

Rasynda da rýhanı jańǵyrýǵa bet burǵan kezeńde mádenıet salasynyń qyzmetkerlerine artylar jaýapkershilik te joǵary. О́z kezeginde sala mamandary óz jumystaryn júıeli jalǵastyrýda.

Mysaly, Qordaı aýdanynda turǵyndarǵa 19 mádenıet nysany: onyń ishinde 1 aýdandyq mádenıet úıi, 11 aýyldyq mádenıet úıleri men 7 klýb mekemeleri, aýdandyq tarıhı-ólketaný mýzeıi, sonymen qatar 1 mobıldi avtoklýb «Zerde», 1 turaqty kınoqondyrǵy, 2 saıabaq mádenı qyzmet kórsetip keledi.

Jalpy, aýdan boıynsha 1,5 mıllıon teńgege 8 kovorkıng jáne 8,3 mıllıon teńgege sıfrlandyrylǵan aqparattyq ortalyqtar ashylǵan. Olar: Stepnoe aýyldyq kitaphanasynda 1 bilim ortalyǵy, Qarakemer, Sarybulaq, Qaınar, Aýqatty, Masanchı, Sortóbe, Alǵa aýyldyq kitaphanalarynda ornalasqan. Sol sııaqty ortalyqtar jyl sońyna deıin Qarasaı, Kenen jáne Sulýtór aýyldyq kitaphanalaryndada ashylatyn bolady.

Sondaı-aq aýdandaǵy mádenı oshaqtardyń qataryn kóbeıtý maqsatynda «Mádenıet obektilerin damytý» baǵdarlamasy boıynsha Otar aýylyna 180 oryndyq jáne Jambyl men Qarasý aýyldarynda 90 oryndyq mádenıet úıleriniń qurylysyn salý úshin jobalyq-smetalyq qujattama ázirleýge 13,1 mıllıon teńge qarastyrylyp otyr.