Nazarbaeva: "Bizde kóbinese bir adam tutas salany basqarady"

Elimizde bıýdjettiń tıimsiz oryndalǵany úshin sheneýnikterdiń jaýapkershiligin arttyrý usynyldy. Atalmysh usynys senat qabyrǵasynda ótken bıýdjet zańnamasyn jetildirý jónindegi keńes barysynda aıtyldy, - dep habarlaıdy joǵary palatanyń baspasóz qyzmetine silteme jasap Qamshy.kz aqparat agenttigi.

Depýtattar aldynda ulttyq ekonomıka mınıstri Rýslan Dálenov sóz alyp, bıýdjet prosesin reformalaý jónindegi jol kartasyn tanystyrdy. Mınıstr kótergen máselelerdiń biri – memlekettik baǵdarlamalar boıynsha bólinetin bıýdjet qarjysynyń tıimsiz jumsalýy boldy.

«Biz 2011 jyldan bastap 2018 jylǵa deıin júzege asqan 10 memlekettik baǵdarlamaǵa taldaý júrgizdik. Olar boıynsha, jalpy alǵanda, shamamen 9 trıllıon teńge ıgerildi, biraq bizdiń oıymyzsha, bıýdjet 608 mıllıard teńgege tıimsiz ıgerildi. Atap aıtqanda, kiris kóbeımegen, jumys oryndary ashylmaǵan jáne taǵy basqa. Biz memlekettik qarjyny tıimsiz ıgergeni úshin, jaýapkershilik belgileý qajet dep sanaımyz. Al memlekettik baǵdarlamalardy iske asyrý jónindegi esepterdi tólengen salyqtar, tabystar, jańa jumys oryndary, ónim shyǵarý kólemi jáne taǵy basqa kórsetkishtermen tolyqtyrý qajet», - dedi Dálenov.

Darıǵa Nazarbaeva memlekettik baǵdarlamalar aıasynda qarajatty tıimsiz paıdalanǵany úshin jaýapkershilikti kúsheıtý jóninde usynystar ázirleý qajettigin qoldady.

«Bizde kóbinese bir adam tutas salany basqarady, memlekettik baǵdarlamany ázirleıdi, al áldebir ýaqyttan keıin munyń bári tıimsiz nemese basymdyqtar qate tańdalǵanyn, memlekettik qazynaǵa zalal kelgenin kóremiz. Biraq eshkimnen suraı almaısyń. Sebebi mamandar aýysyp, basqa adamdar kelgen bolyp shyǵady. Jaýapty adam da joq, ıe de joq. Bizdiń tájirıbemizde qanshama sondaı jaǵdaı kezdesti. Sondyqtan bizdiń usynysymyz: jumystyń aýysýyna qaramastan, burynǵy qyzmetine jaýapty bolý kerek», - dedi senat tóraıymy.

Sonymen qatar bıýdjetti tıimsiz paıdalanǵany úshin ákimshilik aıyppul mólsheri formaldy bolmaýy tıis, kelgen zııanǵa shamalas eseptelýi tıis.

Depýtattardyń pikirinshe, ony talqylaý asa mańyzdy bolady. Qazirgi kezde senat depýtattary esep komıtetimen birlesip, osyndaı aıyppuldardy Ákimshilik quqyq buzýshylyq týraly kodekske engizý máselesin pysyqtaýda.