Anar Fazyljanqyzy: Daýly dybystardyń tańbalanýy ózgeretin kún alys emes

3 qazan kúni Almatyda BAQ jáne baspa qyzmetkerlerine arnalǵan "Jańa emle: qurylymy men mazmuny" respýblıkalyq semınary bolyp ótti. Jıyndy QR Mádenıet jáne sport mınıstrligi Til saıasaty komıteti Sh.Shaıahmetov atyndaǵy "Til-Qazyna" ulttyq ǵylymı-praktıkalyq ortalyǵy uıymdastyrdy. Semınarda jańa álipbı emlesi túsindirildi, dep jazady Qamshy.kz aqparat agenttigi.

Jıyndy ashqan "Til-Qazyna" ulttyq ǵylymı-praktıkalyq ortalyǵynyń atqarýshy dırektory Erbol Tileshov latyn negizdi qazaq álipbıindegi daýly tańbalarǵa qatysty pikir bildirdi.

"Kópti tolǵandyryp júrgen 4-5 tańbaǵa baılanysty usynystar ázirlep, úkimetke joldadyq. Másele ulttyq qoǵamdyq senim keńesiniń otyrysynda da kóterilgeni belgili. Sondyqtan eskertpeler eskerýsiz qalmaıdy dep oılaımyz" dedi ol.

Semınar keńeste "Til-Qazyna" ulttyq ǵylymı-praktıkalyq ortalyǵynyń Qoǵammen baılanys basqarmasynyń basshysy Móldir Baqytqyzy latyn negizdi qazaq álipbıin úıretýge arnalǵan IT jobalardy tanystyrdy.

Emle erejeler men jazýdy kırıllden latynǵa, latynnan kırıllge aýdaratyn  konvertor qazlatyn.kz saıtynda qol jetimdi. Sondaı-aq semınar barysynda qazaqsha sózderdiń mán-maǵynasyn bildiretin sozdikqor.kz saıty men sozdikqor_bot telegram boty tanystyryldy.

"Latyngrafıkaly jańa álipbı negizinde sapaly qazaqtildi kontent qalyptastyrý: máseleler men usynystar" taqyrybynda baıandama jasaǵan "Til-Qazyna" ulttyq ǵylymı-praktıkalyq ortalyqtyń ǵylym hatshysy Anar Fazyljanqyzy otandyq saıttardyń 12 paıyzy ǵana qazaqsha ekenin aıtyp, qazaqtildi kontentti kóbeıtýdiń mańyzdylyǵyna toqtaldy.

Sondaı-aq Anar Fazyljanqyzy "i", "sh", "ý" syndy dybystardyń tańbalaryna qatysty ashyq hattar men usynystar bildirilip jatqanyn aıtty.

"Atalmysh máselege baılanysty ǵalymdar men kóptiń pikiri eskerilip, daýly dybystardyń tańbalanýy ózgeretin kún alys emes" dedi ǵalym.

A.Baıtursynov atyndaǵy Til bilimi ınstıtýtynyń bas ǵylymı qyzmetkeri Quralaı Kýderınova jańa emle erejeler boıynsha kúrdeli sózder men turaqty tirkesterdiń qaı kezde birge, qaı kezde bólek jazylatynyn túsindirdi.