Jambyl oblysy: jastar prezıdenttik synama tapsyrdy

Buqaralyq sportty damytý memleketimizdiń ustanǵan basty baǵyttarynń biri. Ásirese jastar arasynda salamatty ómir saltyn qalyptastyrýdyń mańyzdylyǵy zor. Jáne jastardy dene shynyqtyrýǵa tárbıeleýde prezıdenttik synamalardyń alar orny erek. Osyǵan oraı jastar Jambyl oblysy, Baızaq aýdany, Sarykemer aýylynyń ortalyq stadıonyna jınalyp, bes sport túrlerinen prezıdenttik synama tapsyrdy dep jazady Qamshy.kz aqparat agenttigi.

Aıta ketý kerek, elimizdegi «Halyqtardyń dene shynyqtyrý daıarlyǵynyń prezıdenttik synamalary týraly» Ereje Qazaqstan Respýblıkasy Úkimetiniń 1996 jylǵy 24 maýsymdaǵy №774 qaýlysymen qabyldanǵan bolatyn. Jalpy, prezıdenttik synamalar – halyqtyń oqýǵa, eńbekke, áskerı qyzmetke daıyndyǵynyń jalpy jattyǵýlar jıyntyǵy bolyp tabylady.

Qazaqstan Respýblıkasynyń Tuńǵysh Prezıdenti, Elbasynyń prezıdenttik testi boıynsha sport túrlerinen uıymdastyrylǵan aýdandyq jarys Qazaqstan Respýblıkasynyń V chempıonatyna Jambyl oblysynyń qurama komandasyn jasaqtaý úshin oblystyq kezeńge aýdan quramasyn irikteýdi kózdedi. Atalmysh sharanyń tusaýy Qazaqstan Respýblıkasynyń Gımnimen ashyldy. – Jastar arasynda salaýatty ómir saltyn nasıhattaý úshin aýdandyq ákimdiktiń bastamasymen biz prezıdenttik synama tapsyrý jarysyn ótkizip jatyrmyz. Sondyqtan, bul bastamany aýdannyń búkil jastary men turǵyndary qoldap, salaýatty ómir saltyn, sportpen shuǵyldanýdy ár ýaqytta aldymyzǵa maqsat etip qoıýymyz kerek. Iаǵnı, Elbasy Nursultan Nazarbaevtyń «Máńgilik El» ıdeıasyn júzege asyrý úshin densaýlyǵy myqty, joǵary bilimdi jastar qajet.

Búgingi irikteý jarysynda top jarǵan jeńimpazdar arasynan oblystyq kezeńge baratyn aýdan quramasyn jasaqtaıtyn bolamyz – deıdi aýdan ákimdigi dene shynyqtyrý jáne sport bóliminiń bas mamany Saǵynbek Júnisbekov. Prezıdenttik synamada 18 aýyldyq okrýgten kelgen eki júzden astam aýdan turǵyndary men jastary bes túrli synaq tapsyrdy. Birinshisi bir orynǵa sekirý, qysqa qashyqtyqqa (30, 60, 100 metrge) jáne tózimdilikke (500, 1000 metrge) júgirý, kúsh gımnastıkasy (shalqalap jatyp deneni kóterý, bıik kermege tartylý), granata (300, 500, 700 gramm) men dop laqtyrýdan (150 gramm) óz ónerlerin kórsetti. 9 jas pen 70 jas aralyǵynda, on bir jas ereksheligi boıynsha ótken aýdandyq chempıonatta áıelder (qyzdar) men erler (uldar) bólek-bólek synamalardan ótti. Jarys qorytyndysynda 9-10 jas aralyǵynda J.Tákimova, Beknur Sálimjan, 11-13 jas boıynsha Venera Qudaıbergenova men Asqar Bekarys, 14-15 jas ereksheligi boıynsha Aısha Muhamedjan, Álisher Tashqarbaev, 16-17 jas aralyǵynda Nuraı Qaıyrjanqyzy, Tóre Nurbek top jardy. Al, 18-23 jasta B.Revshenova, A.Alpysbaev, 24-31 jasta I.Baımahanova, A.Septesin, 32-39 jasta A.Ahatov pen S.Týrsynbekova, 40-49 jasta

Q.Qulmahanbetov, D.Bekbosyn, 50-59 jas arasynda A.Turapbaev, L.Sadyqova jeńimpaz atandy. Joǵarydaǵy sport túrlerinen jeńimpaz atanǵan sportshylardan oblystyq irikteý jarystaryna aýdan quramasy jasaqtaldy.