О́kpe aýrýlarynyń emi – ulttyq sýsyn

Jambyl oblystyq týberkýlezge qarsy eresekterge arnalǵan sanatorııinde emdeý-saýyqtyrý sharalarynyń tyń tásili qolǵa alynǵan. Oblys ákiminiń tikeleı bastamasy munda em alýshylarǵa bir mezgil jańadan saýylǵan saýmal berile bastady. Ol úshin sanatorıı janynan saýyn jylqylardy ustaýǵa arnalǵan qorajaı da salynǵan. Munda saýylǵan bıe sútiniń artylǵan bóligi qymyz retinde daıyndalyp, oblystyq ftızıopýlmonologııa ortalyǵyna(burynǵy oblystyq týberkýlezge qarsy dıspanserine) jiberiledi, dep jazady Qamshy.kz aqparattyq agenttigi. 

Aǵymdaǵy jyldyń mamyr aıynan beri qolǵa alynǵan baıandy bastama ókpe aýrýyna ushyraǵandardyń dertine halyqtyq medısınamen daýa tabýǵa múmkindik berýimen erekshelengeli tur. Qadym zamannan jeli qulyn baılap, Qambar ata túligi sútiniń qasıetin sezingen qazaq halqy antıbıotık retinde dál osy qymyzdy paıdalanǵany tarıhtan belgili. Qaryshtap damyǵan jańa tehnologııa dáýirinde de densaýlyq salasynyń mamandary ulttyq sýsynnyń paıdasy zor ekendigin moıyndaıdy.

–Bizdiń sanatorıı buryn ókpe aýrýymen aýyrǵan jáne sozylmaly ókpe qabynýyna ushyraǵan azamattarǵa em-dom jasaý arnalǵan. Mundaǵy emdik sharalar kezinde emdelýshilerge usynylatyn sút ónimderiniń táýliktik normasy 500 mılılıtrdi quraıdy. Osynyń 250 mılılıtrin biz saýmal retinde bere bastadyq. Bul bastamany oblys ákimi kóterip, qala irgesindegi sanatorıı retinde bizdiń mekemede qolǵa alýdy tapsyrdy. Nátıjesinde bıyl mamyr aıynda ótken memlekettik satyp konkýrsynda jeńimpaz tanylǵan «Aqnazarov» jeke kásipkerligi sanatorıı janyna 7 bas bıe baılap, emdelýshilerge kúndelikti saýmal berýdi uıymdastyryp jatyr. Táýligine munda 15 lıtr saýmal ishiledi. Odan artylǵan 30 lıtr bıe sútinen qymyz daıyndalyp, oblystyq ftızıopýlmonologııa ortalyǵyna jiberilip otyrady. Saýmal ókpe aýrýymen buryn aýyrǵandarǵa óte jaqsy kómektesedi. Ásirese ony tańǵy tamaqtan keıin 2 saǵat soń ishken durys. Jáne saýmaldy saýylǵannan keıingi 30 mınýt ishinde tutyný quptalady. Tipti sanatorıı janynan arnaıy kıiz úıde tigildi. Al ókpe aýrýynyń belsendi túrimen emalyp jatqan naýqastarǵa qymyzdyń bereri mol. Kelesi jyly bıe basyn kóbeıtip, Taraz qalasyndaǵy oblystyq týberkýlezge qarsy balalarǵa arnalǵan sanatorııin de jańa saýylǵan saýmalmen qamtamasyz etýdi josparlap otyrmyz, –deıdi oblystyq týberkýlezge qarsy eresekterge arnalǵan sanatorııiniń bas dárigeri Erjan Ábdihalyqov.

Búginde sanatorııde 58 adam em alyp jatyr. Olardy emdeýdiń bir kýrsy 14 táýlikke sozylady. О́tken eki jyl ishinde munda 2269 adam em alǵan. Al jyl basynan bergi 7 aıda sanatorııde 848 adam em-dom qabyldaǵan. Olardyń arasynda ulttyq sýsyndy qoldana otyryp, saýyqtyrýdyń tyń tásiline júgingenderi de barshylyq.