Jambyl oblysy: zamanaýı jylyjaıda balyq ta, kókónis te ósiriledi

Jambyl oblysynyń Qordaı aýdanynda jyldyń tórt mezgilinde ónim beretin jylyjaıynyń jumysy jandana túsýde dep jazady Qamshy.kz aqparat agenttigi.

«Greenwill» jaýapkershiligi shekteýli seriktestigine qarasty jańa tehnologııanyń mol múmkindikterin paıdalaný arqasynda Ortalyq Azııadaǵy eń ozyq agroqurylymǵa aınaldy, dep jazady Qamshy.kz aqparattyq agenttigi.

 Bul agrokeshen ázirge oblystaǵy jyl 12 aı ónim beretin birden bir jylyjaı sanalady. 4 gektar aýmaqta ornalasqan jylyjaıdan jylyna 1200 tonna ónim alynady. Mundaǵy óndiristik proses túgelimen jańa zamanaýı qondyrǵylarǵa ıek artady. Jylyjaıda tamshylatyp sýǵarý júıesi engizilgen. Bul júıe ósimdikterdiń tamyryna qajetti sýdyń úzdiksiz jetkizilýin qamtamasyz etýden bólek tyńaıtqyshtyń da ósimdik tamyryna udaıy nár beredi. Keshendegi kompıýterlik qondyrǵylar ondaǵy klımattyń ósimdikke qolaıy bolýyn baqylaıdy. Munda qazirgi tańda 20 adam jumyspen qamtylǵan al ónimdi jınaý naýqanynda jumysshylary sany 60 adamǵa deıin artady.

Seriktestik jetekshisi Arsmane Harkı naryqtaǵy jańa óskin kókónisterge suranystyń joǵary ekenin alǵa tartady. Kásipker bıyl taǵy bir jylyjaı keshenin iske qosýdy josparlap otyr.

–Bolashaqta jylyjaıda qazir ósiriletin qııar men qyzanaqtan bólek burysh pen qulpynaıdy ósirýdi qolǵa alamyz. Qulpynaıdyń joǵary sapaly ońtústikkoreıalyq surypyn 1 gektarǵa otyrǵyzyp, qys mezgilinde 50 tonna ónim alýǵa nıet tanytyp otyrmyz, –deıdi Arsmane Harkı.

Jalpy jylyjaı jumysynyń basty ereksheligi onyń akvoponıkalyq tásilimen jumys jasaýynda bolyp otyr. Bul ádis ozyq tehnologııalar kómegimen bir mezgilde balyq pen ósimdikti qatar ósirýge múmkindik beredi. Jylyjaıdy jabdyqtaý jumystary Ońtústik Koreıanyń «MANN CEA» akvaferma kompanııasymen júrgizilgen. Búginde agrokeshende jylyna 300 tonna salattyń «Aısberg», «Rýkkola», «Lıstovoı», «Roblen» suryptaryjáne 40 tonna «Tılapııa» balyǵyn óndirýdi maqsat etken.

Jaqynda ǵana aýdanda resmı issaparmen bolǵan Aýyl sharýashylyǵy mınıstriniń orynbasary Aıdarbek Saparov ta bul keshenniń jumysyn joǵary baǵalap, onyń respýblıka aýmaǵyndaǵy akvaponıkalyq tásilmen ónim beretin tuńǵysh jylyjaı ekendigin basa nazar aýdardy. Aldaǵy ýaqytta bul keshendegi jumys júıesi respýblıkanyń basqa óńirlerinde salynatyn zamanaýı jylyjaılardyń óndiristik úderisine engizilmek.