Qutqarýshylar tender tálkeginen toryqty

«Aq Beren» JShS avarııalyq qutqarý qyzmeti Mańǵystaý fılıalynyń dırektory Amangeldi Qýanalıevtiń aıtýynsha, Mańǵystaý oblysynda munaı-gaz salasynda apattar bola qalǵan jaǵdaıda kásibı mamandarymen tolyqqan, tehnıkasy ozyq, tájirıbeli qutqarý qyzmeti kómekke shuǵyl kiriskeni abzal. Oblys aýmaǵynda qyzmet etip jatqan irili-usaqty óndiris oshaqtarynda jumys tártibi qatań saqtalady delik. Desek te, tilsiz jaý kezdeısoq bolǵanda, ony aýyzdyqtaýǵa shamamyz kele me?

Qazir tender tálkegi qutqarýshylardy ábden tıtyqtatqan kórinedi.  120-dan astam adam eńbek etetin, zamanaýı 40 shyqty arnaıy iri tehnıkasy bar bul seriktestikpen tenderge teń dárejede aty-jóni belgisiz, qyzmeti kúmándi kompanııalar túsedi eken. Qyzmet qunyn 4-5 ese tómen qoıyp, tenderdi jeńetin olarda bári qaǵaz júzinde ǵana bar. Shyntýaıtynda, «bir kabınet» ishinde qyzmet etip, ne turaqty bazasy, ne tehnıkasy, tipti mardymdy qutqarýshylary joq bop shyǵady.  Oǵan dálel- «Embimunaıgazdan» munaı atqylap, apat bolǵanda joǵaryda atalǵandaı kompanııanyń biri oqıǵa ornyna múldem kelmeı qoıǵan. Olarǵa tıesili barlyq jumysty «Aq berendikter» atqaryp, qaýipti joıǵan.

«Jaqynda «Qarajanbasmunaıgaz» kompanııasy tender jarııalap, ony az qarajatqa aqtóbelik qutqarý kompanııasy jeńip shyǵady. О́zderiniń qaýipsizdigin qamtamasyz etýshilerdi tekserip Aqtóbege barǵan munaı kompanııasy ókilderi aty bar, zaty joq qutqarýshylardy eshqandaı talapqa saı emes dep tanyp, kelisimshartty dereý toqtatqan. Bul - jumystaryna jaýapkershilikpen qaraıtyn munaı kompanııasynyń áreketi. Biraq barlyǵy osylaı qutqarýshylarmen jete tanyssa jaqsy ǵoı. Bir ǵana kelisimmen, «barmaq basty, kóz qysty» áreketpen jasalatyn tenderlerge toqtam kerek»,- deıdi Amangeldi Qurmashuly.

Búginde «Aq beren» JShS Mańǵystaý fılıalymen óńirdegi 50 shaqty kompanııa kelisimshartqa otyrǵan.  24 saǵat kezekshilikpen eńbek etetin qutqarýshylardyń aýyz toltyryp aıtatyn jetistikteri barshylyq. Olar «Qalamqas» ken ornynda birneshe kúnge ulasqan órtti aýyzdyqtap, úlken qaterdi toqtatty.

Buryn respýblıkalyq memlekettik mekeme quramynda bolyp, 51 jyldyq tarıhy bar kásiporyn osy jyldyń naýryzynan beri JShS-i bolyp ózgerdi. О́z qyzmetin respýblıkalyq bıýdetten qarajat almaı, qyzmet kórsetiletin sharýashylyq sýbektilerimen sharttardy oryndaýdan túsken jeke kiristeri esebinen júzege asyryp keledi.

Kásiporyn qyzmetiniń negizgi maqsaty - qaýipti óndiristik nysandarda tótenshe jáne apattyq jaǵdaılarda júrgiziletin taý-ken qutqarý, atqylamaǵa qarsy, gazdan qutqarý, qaterdiń aldyn alý, sondaı-aq, órtti sóndirý jáne alǵashqy medısınalyq kómek kórsetý jáne basqa da avarııalyq-qutqarý jumystaryn atqarý.

Kásiporyn qoıylǵan maqsattaryn iske asyrý úshin qyzmetterin joǵary sapa, asqan jaýapkershilikpen júzege asyrady. Mekemede tehnıkalyq qaýipsizdik sharalary qatań saqtalady. Mamandar kúndelikti jattyǵyp, jylyna bir ret attestasııadan ótip otyrady. Respýblıkalyq deńgeıdegi oqý-jattyǵýlarda aq berendikterdiń shashasyna shań juqqan emes.

Mekemede qyzmetkerlerdi áleýmettik turǵydan qoldaý da qarastyrylǵan. Olar jylyna bir ret tegin medısınalyq tekseristen ótedi. Saýyqtyrý oryndary, eńbek demalysy, bala týý, sabaqqa barý nemese otbasyndaǵy qaıǵyly jaǵdaı kezinde qarjylaı kómek beriledi. Munyń ózi qutqarýshylardyń óz qyzmetine salǵyrt qaramaýyna serpin berip keledi.