Jambyl oblysy: oblystyq semınarda jańa álipbıdi engizý joldary talqylandy

Tarazda «Jańa álipbı – jańǵyrý joly» taqyrybynda oblystyq semınar ótti dep jazady Qamshy.kz aqparat agenttigi.

Jambyl oblysy ákimdiginiń tilderdi damytý basqarmasy Tilderdi oqytý ortalyǵy uıymdastyrǵan jıynǵa til máselesin kóterip júrgen zııaly qaýym ókilderi, oqý oryndaryndaǵy jańa álipbıdi zertteýshi ǵalymdar men fılolog mamandar qatysty.

Semınarda memlekettik tildiń qazirgi jaı-kúıi men damý baǵyttary týraly aqparattar baıandalyp, ózekti saýaldarǵa jaýaptar berildi. Sonymen qatar, jańa emle erejelerin eresekterge meńgertýdiń ǵylymı-praktıkalyq ustanymdaryn oqytý prosesinde kezdesetin qıyndyqtardy saralaý jáne olardy sheshýdiń ádistemelik joldaryn qarastyryldy. Qazaqstan Respýblıkasynyń Tuńǵysh Prezıdenti, Elbasy N.Nazarbaevtyń 2018 jylǵy 19 aqpandaǵy №637 Jarlyǵynda bekitilgen latyn grafıkasyndaǵy qazaq tili álipbıine kóshýge baılanysty Qazaqstan Respýblıkasy Premer-Mınıstriniń 2018 jylǵy 13 naýryzdaǵy №27-О́ ókimimen bekitilgen «Qazaq tili álipbıin latyn grafıkasyna 2025 jylǵa deıin kezeń-kezeńimen kóshirý jónindegi is-sharalar josparynyń» 6 tarmaǵyna sáıkes qazaq tili álipbıin latyn grafıkasyna kóshirý jóninde qoǵamda keńinen nasıhattaý jaıy talqylandy.

Jıynda til mamandary baıandama jasap, óz oılaryn ortaǵa saldy. Máselen, onomast ǵalym, til janashyry M.H.Dýlatı atyndaǵy Taraz memelekettik ýnıversıtetiniń fılologııa jáne jýrnalıstıka kafedrasynyń dosenti, fılologııa ǵylymdarynyń kandıdaty Zıba Qulamanova jańa álipbı – eldik, egemendik, saýattylyq kórsetkishi ekenin aıtsa, Taraz ınnovasııalyq-gýmanıtarlyq ýnıversıtetiniń dosenti, fılologııa ǵylymdarynyń doktory Qasıet Molgajdarov memlekettik til mártebesindegi jańa álipbıimiz jaıly oı qozǵady. Sondaı-aq, oblystyq «Rýhanı jańǵyrý» jobalyq ofısiniń basshysy Serikbol Berikqoja baıandy baǵdarlamanyń aımaqtaǵy iske asý barysy jaıly maǵlumat berip ótti. Sonymen qatar, Taraz memelekettik pedagogıkalyq ýnıversıtetiniń professory, pedagogıka ǵylymdarynyń doktory Tursynaı Ábdiqadyrova, M.H.Dýlatı atyndaǵy Taraz memelekettik ýnıversıtetiniń dosenti, fılologııa ǵylymdarynyń kandıdaty, professor Kúlzınat Qarymbaeva, Taraz ınnovasııalyq-gýmanıtarlyq ýnıversıtetiniń «Rýhanı jańǵyrý» ortalyǵynyń jetekshisi Baqtııar Beknazarovtar taqyrypqa qatysty pikirlerin aıtty.

Basqosý barysynda Tilderdi oqytý ortalyǵynyń oqytýshysy, jańa álipbıdi oqytý ádistemesiniń treneri Aqbota Ǵabdollaqyzy «Latyn grafıkasyn meńgertýdiń tıimdi joldary» taqyrybynda trenıng ótkizdi.

Semınar sońynda qatysýshylarǵa arnaıy sertıfıkattar tabystaldy.