Endi mekenjaı anyqtamasy kerek emes

Ishki ister mınıstrligi azamattardyń tirkeý týraly málimetterin elektrondy formatqa kóshiredi dep habarlaıdy Qamshy.kz aqparat agenttigi IIM baspasóz qyzmetine silteme jasap. 

Azamattardy tirkeý týraly málimetterdi berý memlekettik qyzmetter arasynda jıi suralady. Jyl saıyn halyq qujattardy, jeńildikterdi, járdemaqylardy jáne basqa da qyzmetterdi alý úshin memlekettik organdar men uıymdarǵa 10 mıllıonnan asa mekenjaı anyqtamalaryn alady. Jumysqa, mektepterge, balabaqshalarǵa, emhanalarǵa, bankterge ornalasý kezinde azamattar HQKO-ǵa, memlekettik organdarǵa turaqty túrde júginý arqyly kezekte turyp, ýaqyt joǵaltady. 

"IIM óz derekter bazasyn basqa memlekettik organdarmen biriktirdi, bul halyqqa memlekettik qyzmet kórsetý mehanızimin jeńildetti. Endi mekenjaı anyqtamalaryn berý tolyǵymen alynyp tastalady, sebebi bul derekter barlyq memlekettik organdardyń bazasynda bar.

Memlekettik qyzmetterdi alý ýaqytyn qysqartý jáne qaǵazbastylyqqa jol bermeý maqsatynda mekenjaı anyqtamasy endi suralmaıdy", - dep habarlady vedomstvodan. Mınıstrlik ókilderi, qazirgi ýaqytta normatıvtik-quqyqtyq aktilerge tıisti túzetýler engizilip jatqanyn aıtty. 

"Sonymen qatar, azamattardyń ózderi tirkeý mekenjaıy týraly málimetterdi "elektrondyq úkimet" portalyndaǵy jeke kabınetinde teksere alady. Turǵyn úı ıeleri sondaı-aq, portal nemese "elektrondyq úkimettiń" mobıldik qosymshasy arqyly olarda tirkelgen tulǵalar týraly málimetterdi teksere alady. Mekenjaı anyqtamalaryn berýdi joıý arqyly - artyq qaǵaz qujat aınalymyn qysqartý jáne azamattarǵa anyqtama alý úshin HQKO-ǵa júginý qajettiligi joıylady. 

Sonymen qatar, IIM azamattardy tirkeýge baılanysty basqa da birqatar memlekettik qyzmetterdi jeńildetip, ońtaılandyrdy", - delingen habarlamada.