Pavlodar oblysynda 1358 adam júrgizýshi kýáliginen aıyryldy

О́ńirde 53 myńnan astam jol qozǵalysy erejeleriniń buzýshylyǵy anyqtaldy dep habarlaıdy Qamshy.kz aqparat agenttigi pavlodarnews.kz saıtyna silteme jasap.

Oblystyq polısııa departamenti baspasóz qyzmetiniń málimdeýinshe, departamenttiń basshysy polısııa general-maıory Amantaı Áýbákirov kezekti halyqpen esep berý kezdesýin ótkizdi. Kezdesý barysynda aqyrǵy 4 jylda qylmystylyqtyń turaqty tómendeýin atap ótti.

Polısııa is-qımylynyń basymdy baǵyttarynyń biri esirtki qylmysymen kúresý bolyp tabylady, - dedi departament basshysy. – Bıylǵy 8 aıda 149 esirtki quqyq buzýshylyǵy, onyń ishinde esirtki zattaryn asa iri kólemde satý jáne saqtaýǵa baılanysty 50 qylmys anyqtaldy. Esirtki zattaryn alýdyń jalpy kólemi 102 kelini quraıdy. Sondaı-aq oblysymyzda brakonerlik másele de ózekti bolyp tabylady. Bıyl reıdtik is-sharalar ótkizý nátıjesinde tabıǵatty qorǵaý zań salasynda 42 qylmystyq jáne 580 ákimshilik quqyq buzýshylyq anyqtaldy. 4,5 mıllıon teńgege aıyppul salyndy.

Vedomstvo basshysy óz baıandamasynda oblys joldaryndaǵy jaǵdaılarǵa da qysqasha toqtalyp ótti.

Bul salada biz 53 myńnan asa jol qozǵalysy erejeleriniń buzýshylyǵyn anyqtadyq, - dedi Amantaı Áýbákirov. – 1358 quqyqbuzýshy júrgizýshi kýáliginen aıyryldy. Alkogoldik mas kúıde 1361 júrgizýshi ustaldy. Onyń 201-i ákimshilik qamaýǵa alyndy. 586 mıllıon teńge kóleminde aıyppul salyndy.

Sonymen qatar, búginde odorologııalyq zerthana óziniń oń nátıjelerin kórsetýde. Qyzmettik ıtterdiń kómegimen ıis pen izderdi paıdalana otyryp, arnaıy krımınalıstıkalyq zertteýler júrgizilýde. Olardyń kómegimen 2 kisi óltirý, 2 tonaý qylmysy ashyldy.

Eń ózekti másele – qaýipsizdik salasyn sandyq júıege kóshirý, - dedi departament basshysy. – Pavlodar qalasynda beınebaqylaý Jedel basqarý ortalyǵynyń 117 kamerasy arqyly júzege asyrylady. Ekibastuz, Aqsý jáne oblys aýdandarynyń kezekshi bólimderinde 130 beınebaqylaý kameralary qyzmet etedi. Aǵymdaǵy jyldyń 8 aıy ishinde olardyń kómegimen 100-den asa qylmys ashylyp, 19 myń ákimshilik quqyq buzýshylyq anyqtaldy.