Qoǵamda beıbitshilik pen kelisimdi qamtamasyz etýde QHA-nyń róli erekshe mańyzdy

Almatydaǵy Dostyq úıinde ótken respýblıkalyq forýmnyń kún tártibinde Qazaqstan Halyqtary Assambleıasy qoǵamdyq kelisim keńesteriniń qazaqstandyqtardyń ómir súrý sapasyn jaqsartýdaǵy róli týraly aıtyldy.

Forýmnyń jumysyn ashqan Almaty qalasynyń ákimi, Almatydaǵy QHA-nyń tóraǵasy Baqytjan Saǵyntaev qoǵamda beıbitshilik pen kelisimdi qamtamasyz etýde Assambleıanyń rólin erekshe atap ótti.

«Almatyda 100-den astam etnos ókilderi turady. Qalada 19 respýblıkalyq jáne 37 qalalyq etnomádenı birlestikterdiń ofısteri ornalasqan. Tipti, Almatyda 10 etnıkalyq BAQ tirkelip, jumystaryn júrgizýde, etnomádenı birlestikter janynda úsh ulttyq teatr jáne 27 shyǵarmashylyq ujymdar bar», – dedi Almaty ákimi.

Sonymen qatar, ol azamattardyń týǵan tilderinde sóıleıtinin, ózderiniń mádenıeti men dástúrlerin saqtaıtynyn, ózderiniń dástúrli dinderin erkin ýaǵyzdaıtynyn atap ótti.

Bulardan ózge, B. Saǵyntaev Assambleıa qurylymyndaǵy qoǵamdyq kelisim keńesteriniń mańyzdy rólin basa kórsetti.

«Olar qoǵamdyq baqylaý mindetin atqarýda, halyqty tolǵandyratyn máselelerdi qaraýda, qoǵamdyq mańyzdy sharalardy uıymdastyrýda, qaıyrymdylyqty, mesenattyqty, medıasııany damytý máselelerimen aınalysýda. Bul jumystar úkimettik emes uıymdarmen jáne jastar birlestikterimen, dinı konfessııalar ókilderimen, BAQ jáne túrli memlekettik uıymdarmen yntymaqtastyq aıasynda júzege asýda», – dep atap ótti qala basshysy.

Aıta keterligi, forým barysynda qazaqstandyqtardyń ómir súrý sapasyn arttyrý men ál-aýqatyn jaqsartýǵa baǵyttalǵan mindetterdi oryndaýda qoǵamdyq kelisim keńesteriniń jumysy talqylandy.

«Memleket basshysy Qazaqstan halqyna Joldaýynda qoǵamdaǵy júıeli ózgeristerge, sonyń ishinde halyqtyń tabysyn arttyrý men áleýmettik problemalardy sheshýge baǵyttalǵan strategııalyq mindetterdi qoıdy. Prezıdent atap ótkendeı, «Bizdiń ortaq mindetimiz – azamattardyń barlyq mańyzdy ótinishterine jedel ári erekshe nazar aýdaratyn «Estı alatyn memleket» qalyptastyrý.Tek bılik pen qoǵam arasynda turaqty dıalog júrgizý arqyly zamanaýı geosaıasat mátinine negizdelgen úılesimdi memleket qurýǵa bolady», – dedi Almaty ákimi.

B. Saǵyntaev qoǵamdy tolǵandyryp otyrǵan barlyq máseleler boıynsha naqtyly jospar jasalǵanyn, olar medısınany, bilimdi, qaýipsizdik pen áleýmettik qoldaýdy damytý ekenin atap ótti.

«Qala basqarmalarynyń basshylary jáne aýdandar ákimderi halyqpen keri baılanys jasaý úshin áleýmettik jelilerde akkaýnttar ashýmen qatar, Ashyq esik kúnderin turaqty ótkizip keledi. Nazarǵa alynbaǵan árbir ótinish úshin birinshi basshylar jeke jaýapkershilikke tartylady. Kadrlyq sheshimder eń aldymen olardyń turǵyndarmen jumys júrgizý baǵasy negizinde júrgiziletin bolady», – dep atap ótti ol.

B. Saǵyntaev Almatyny damytýda jeti strategııalyq baǵytty atap ótti:

1. Almaty mádenıet pen órkenıet túıisken álemdik qala bolýy, qala turǵyndarynyń ómir súrý sapasy men ekonomıkalyq múmkindikteri boıynsha 100 megapolıster topyna enýi tıis.
2. Bastamalar qalasy. Jergilikti jerlerdegi problemany sheshý turǵyndardyń belsendiligin qajet etedi. Problemanyń 90%-y turǵyndardyń bastamasy boıynsha jergilikti jerde sheshimin tabýy tıis.
3. Iskerlik astana. Investısııany, tehnologııany jáne talanttardy tartýdyń ortalyǵy.
4. Mádenı astana. Bilimniń, turmystyń jáne buqaralyq mádenıettiń joǵary deńgeıiniń standarttary men sánin kórsete alatyn erekshe zamanaýı qala.

Taǵy bir mańyzdy baǵyt Almatyny etnıkaaralyq kelisim men dinıaralyq ózara túsinistik ortalyǵy retinde damytý.

«Etnıkaaralyq kelisim men dinıaralyq ózara túsinistikti nyǵaıtýdy jalǵastyramyz, qalamyzdaǵy barlyq etnıkalyq toptardyń tilderi men mádenıetin damytýǵa jaǵdaı jasaımyz, qazaq tiliniń ultaralyq qatynas tiline deıingi rólin kúsheıtemiz, ÚEU-dyń bedelin arttyramyz», – dep atap ótti ákim.

Forýmnyń jumysyna Qazaqstan halqy Assambleıasy Tóraǵasynyń orynbasary – Hatshylyq meńgerýshisi J. Túımebaev, QR Parlamentiniń depýtattary, Assambleıa Keńesiniń, qoǵamdyq kelisim keńesiniń, QHA ǵylymı-saraptama keńesiniń músheleri, memlekettik organdardyń jáne etnomádenı birlestikterdiń ókilderi qatysty.