Qulanda kanadalyq kúrketaýyqtar ósirilip jatyr

Qulanda qus sharýashylyǵy erekshe serpinmen damyp keledi. Tek aǵymdaǵy jyldyń alǵashqy alty aıynyń ózinde T.Rysqulov aýdanyndaǵy qustyń sany 113 010 dana jetip, 103,1 paıyzdyq ósimdi kórsetken. Aýdandaǵy Aqyrtóbe aýylynyń turǵyny Násiphan Omarbekov 200 bas kanadalyq kúrketaýyq ósirip otyr, dep jazady Qamshy.kz aqparat agenttigi. 

Kezinde tis dárigerlikpen aınalysqan Násiphan Omarbekov búginde zeınetkerlikte. Qurmetti eńbek demalysyna shyqqan qarııa úıinde qur beker qarap otyrýdy jón sanap kásiptiń osy bir erekshe túrin qolǵa alǵan eken.

–Qolymyzdaǵy barlyq maldy jaz kelgennen jaılaýǵa jiberemiz. Osy sátte qym-qýyt tirlikten qol bosap qalady. Sondyqtan osy jazda bos otyrmaı kásippen aınalysýǵa bel býdym. Uldarymnyń kúrketaýyq ósirý ıdeıasyn qabyl alyp, onyń «BIG-6» dep atalatyn erekshe túrin kútip ustaýǵa táýekel ettim. Sodan Almatydaǵy arnaıy kásiporynnan tegi kanadalyq kúrketaýyqtyń 200-deı bir aılyq balapanyn satyp alyp iske kirisip te kettik,–deıdi qarııa.

Bir qyzyǵy kúrketaýyqtyń «BIG-6» atalatyn túriniń jumyrtqalary bizdiń elimizge Kanada memleketinen jetkiziletin kórinedi. О́z kezeginde kanadalyq kúrketaýyq nebári 5 aıda 20-25 kelige deıin et beretin kórinedi. Ári bul úı qustaryna ustaýdyń erejeleri de qarapaıym. Bastysy qustar ashyq qorada baptalǵany durys. Sebebi jabyq qorada ustalǵan kúrketaýyqtardyń ózderiniń sańǵyryǵan bólingen gazdan ýlanyp qalýy da múmkin eken.

–Alaıda kúrketaýyqtyń mejeli merzimdi tıisti salmaq jınaýy úshin onyń tıisti qorektik zattarmen qorektengeni abzal. Atap aıtqanda bir aılyq balapan keshinde olar «Start» dep atalatyn jemmen qorektenedi. Úsh aılyǵynan bastap jemniń «Rost» atalatyn túrine kóshedi. Al, tórtinshi jáne besinshi aılarda «Fınısh»-pen tamaqtandyrǵan abzal. Oǵan qosa tamaqtandyrý rejıminde arnaıy antıbıotıkter, vıtamınder berip otyrǵan jón,–deıdi qus sharýashylyǵyn qolǵa alǵan kásipker.

Turǵyndarynyń deni mal etine jeńsik Qazaqstanda da kúrketaýyq etine suranys joǵary kórinedi. Ony Aqyrtóege kanadalyq kúrketaýyqty jersindirgen qarııa aıtady. Tipti ol baptaǵan kúrketaýyq babyna jeter-jetpesten onyń etin satyp alýǵa qushtarlyq tanytqandar tabylypty.