Jambyldaǵy Atlah qalashyǵyna arheologııalyq qazba jumystary júrgiziledi

Jambyl oblysynyń ákimi Asqar Myrzahmetovtiń tapsyrmasyna saı Taraz qalasynan 25 shaqyrym qashyqtyqtaǵy Atlah qalasynyń ornyna arheologııalyq zertteý jumystary júrgizilmek. Bul jaıynda oblys ákiminiń Jambyl aýdanyndaǵy jumys sapary kezinde belgili boldy, dep jazady Qamshy.kz aqparat agenttigi. 

Aýdanǵa jasaǵan sapary kezinde tarıhı orynǵa arnaıy at basyn burǵan óńir basshysy osy mańda bolǵan Atlah-Talas shaıqasynyń tarıhı mán mazmunyna toqtalyp, jaýapty tulǵalarǵa bul mańda arheologııalyq zertteý jumystaryn júrgizýdi keshiktirmeı qolǵa alýǵa tapsyrma berdi. О́z kezeginde tarıhshylar da bizdiń jyl sanaýymyzdyń 751 jyly munda bolǵan Atlah shaıqasynyń ıslem órkenıetiniń qazaq dalasyna taralýynda sheshýshi mánge ıe shaıqas bolǵanyn atap ótti. Sondyqtan óńir basshysy bul qasıetti oryndy nasıhattaý, onyń otandyq tarıhqa belgisiz qyryn meılinshe tanytý jumystaryna jiti nazar aýdarý kerektigin atap ótti. Sáıkesinshe bul sharýalar keshendi arheologııalyq ǵylymı-zertteý men barlaý-qazba sharalar arqyly júzege asyrylmaq.

Jambyl oblystyq tarıhı-mádenı eskertkishterdi qorǵaý jáne qalpyna keltirý dıreksııasy dırektorynyń orynbasary Saýran Qalıev Atlah qalashyǵyn ǵylymı zertteý jumystaryna jergilikti tarıhshy-arheolog ǵalymdardy tartylatyndyǵyna basa nazar aýdardy. Oblys ákimi óńir tarıhqa kópke tanytýdy maqsat etken mundaı sharaǵa qarjy oblystyq bıýdjetten bólinetindigin aıtty.

Aıta keteıik, Atlah shaıqasy bizdiń jyl sanaýymyzdyń 751 jyly Taraz mańyndaǵy Atlah qalashyǵynyń mańynda qytaı jáne arab áskerleriniń arasynda bolǵan. Atlah qalashyǵy jaıynda derekter tarıhı málimetterde molynan kezdesedi. Máselen ataqty tarıhshy Mahmýd Qashqarıdyń óz eńbekterinde «Atlah – Tarazdyń mańyndaǵy qalanyń aty» dep atap kórsetedi. Taǵy bir tarıhshy A.Bernshtamnyń jazbalarynda Atlahtyń qaldyǵy – Jýantóbe ekendigi aıtylady. Atlah mańyndaǵy keskilesken urysta jeńilis tapqan qytaı áskerleri odan keıin túrki elderine shabýyl jasaýdy doǵarypty. Bul shaıqastyń taǵy bir mańyzdylyǵy onyń sol tustaǵy geosaıasatqa áser etip, qazaq jerinde ıslam órkenıetiniń keńinen órken jaıýyna sebep bolýymen baılanystyrylady. Osy shaıqastan kóp ótpeı qazirgi Qazaqstan aýmaǵynda bılik qurǵan Qarahan handyǵy ıslam dinin memlekettik din retinde qabyldaǵany tarıhtan málim.