Erlan Áýkenov Svetlana Jaqypovanyń ornyna qyzmetke taǵaıyndaldy

QR Úkimetiniń qaýlysymen Erlan Áýkenov Qazaqstan Respýblıkasynyń eńbek jáne halyqty áleýmettik qorǵaý vıse-mınıstri qyzmetine taǵaıyndaldy. Buǵan deıin atalǵan laýazymdy atqarǵan Svetlana Jaqypova bergen ótinishine sáıkes, óz qalaýy boıynsha qyzmetinen bosatyldy dep habarlaıdy Qamshy.kz aqparat agenttigi Úkimet baspasóz qyzmetine silteme jasap. 

Erlan Muratuly Áýkenov 1984 jyly 5 qyrkúıekte Almaty qalasynda týǵan. Ál-Farabı atyndaǵy Qazaq ulttyq ýnıversıtetin, "Bolashaq" baǵdarlamasy boıynsha Bredford ýnıversıtetin, Halyqaralyq bıznes akademııasyn, London ekonomıka jáne saıası ǵylymdar mektebin támamdaǵan. 

Túrli jyldary QR Bilim jáne ǵylym mınıstrliginde, "XXI ǵasyr kóshbasshysy" jastar ortalyǵy" RQB, "Qazaqstan jastarynyń kongresi" ZTB, "Samǵaý" ulttyq ǵylymı-tehnologııalyq holdıngi" AQ eńbek etken.

2010-2011 jyldary - Shyǵys Qazaqstan oblysy ákiminiń apparaty basshysynyń orynbasary; 2011-2014 jyldary - QR Prezıdenti Ákimshiliginiń memlekettik ınspektory; 2014-2015 jyldary - Soltústik Qazaqstan oblysy ákiminiń orynbasary qyzmetterin atqardy.  2015-2019 jyldary Almaty qalasy ákiminiń orynbasary laýazymyn atqardy, áleýmettik ál-aýqat máselesi boıynsha jetekshilik etken.