"Jarqum" ken ornynyń kógildir otynmen qamtýdaǵy kómegi kóldeı

Osydan týra bes jyl buryn oblys jurtshylyǵy Talas aýdanyndaǵy «Amangeldi gaz» ken orny mańynan «Jarqum» ken ornynyń ashylý saltanatyna kýá boldy. Sol tusta oblystaǵy gaz-ken óndirisi salasyna tyń serpin bergen jańa ken ornynyń ashylýymen óńirdegi eldi mekenderdi kógildir otynmen qamtý isi kúsh alatyndyǵy aıtylǵan bolatyn. Rasynda osy 5 jyl ishinde «Jarqum»gazy myńdaǵan jambyldyqtyń ıgiligine jarady, dep jazady Qamshy.kz aqparat agenttigi. 

Jalpy Jambyl oblysy óńirdegi gaz óndirý isiniń alpaýyt sanalatyn «Amangeldi gaz» ken ornynan jylyna 330 mıılıon tekshe metr gaz beredi. Ken orny paıdalanýǵa berilgen alǵashqy 10 jyldyń ózinde munda óndirilgen 3,5 mıllıard tekshe metr gaz óndiristik, turmystyq qajettilikterge jumsalǵan eken. Al 2014 jyly 4 burǵylaý qondyrǵysymen iske qosylǵan «Jarqum» ken orny jylyna 65 mıllıon gaz berýge qabiletti. Bul ken orny el ıgiline berilgen alǵashqy jyldary munda 30-ǵa jýyq adam eńbek etken. Ken ornynyń negizgi maqsaty 2000 metr tereńdiktegi kógildir otyn óndirisine jol ashyp, ony jaqyn mańdaǵy Talas, Baızaq aýdandary turǵyndarynyń ıgiligine aınaldyrý boldy. Sondaı-aq ken ornynyń ashylýymen Talas, Baızaq aýdandary men Taraz qalasynyń kógildir otynmen qamtylmaǵan bólikterin gazdandyrý isi sony serpin aldy. Sol sekildi, óndiristik qala sanalatyn Jańatas qalasyna Qarataý qalasy arqyly gaz jetkizý de josparlandy.

Jalpy ótken jyly Jambyl oblysynda eldi mekenderdi gazdandyrýǵa oblystyq bıýdjetten 344 mıllıon teńge, respýblıkalyq bıýdjetten 2 mıllıard teńge qarjy qarastyryldy. Atalǵan qarjyǵa Talas aýdanynyń 5 eldi mekeni men Sarysý aýdanynyń 4 eldi mekenine gaz qubyry tartyldy. Aǵymdaǵy bul jumystardy tolyq aıaqtaýǵa oblystyq bıýdjetten 22 mıllıon teńge, respýblıkalyq bıýdjetten taǵy 198 mıllıon teńge bólinip maqsatty ıgerilýde.Sondaı-aq bıyl Baızaq aýdanyn gazben qamtamasyz etý úshin oblystyq bıýdjetten 1 mıllıard 365 mıllıon teńge bólindi. Bul qarjy aýdandaǵy 10 eldi mekendi kógildir otynmen qamtý isine jumsalatyn bolady.

Munan bólek Jambyl aýdanynyń 13 eldi mekenin gazdandyrý úshin respýblıkalyq bıýdjetten 300 mıllıon teńge, oblystyq bıýdjetten 33,3 mıllıon, al Jýaly aýdanynyń 15 eldi mekenin gazdandyrý úshin respýblıkalyq bıýdjetten 704 mıllıon teńge oblystyq bıýdjetten osynyń 70 mıllıon teńge kóleminde qarjy qaraldy. Sarysý aýdanynyń eldi mekenderin, Jańatas qalasyn gazdandyrý úshin «Shaıan –«Evro-Hım»-Jańatas» joǵary qysymdy gaz qubyry qurylysy arqyly sheshilmek. Bul jobaǵa bastaý úshin 3 mıllıard teńge bólindi. Nátıjesinde óńirdegi eldi mekenderdi gazdandyrý máselesi aldaǵy 7-8 jylda tolyǵymen óz sheshimin tappaq.