Jambyl oblystyq arhıvine 80 jyl

1939 jyldyń 14 qazanynda Jambyl oblysy qurylǵannan keıin ondaǵy qoǵamdyq-saıası qyzmetti júzege asyratyn memlekettik mekemeler de quryla bastady. Sonyń biri oblystyq arhıv mekemesi bolatyn. Atalǵan mekeme Qazaq Sovettik Sosıalıstik Respýblıkasy Ishki ister halyq komıssarlary oblystyq basqarmasynyń buıryǵymen quryldy, dep jazady Qamshy.kz aqparat agenttigi. 

«Oblysta muraǵat bólimin qurý týraly» Ishki ister halyq komıssarlarynyń №1875 buıryǵy 1939 jyldyń 22 jeltoqsanynda shyqty. Al muraǵat bólimi ishki ister halyq komıssarlary oblystyq basqarmasynyń janynan 1940 jyldyń qańtarynan bastap jumys jasaı bastady. Jalpy óńirdegi muraǵat júrgizý isi 1918 jyldan qolǵa alynǵan. Dál osy jyly «Muraǵat isin qaıta uıymdastyrý týraly dekret» shyǵyp Túrkistan Avtonomdyq Sovettik Sosıalıstik Respýblıkasy Syrdarııa oblysy, Ońtústik Qazaqstan oblysy quramyndaǵy barlyq aýdandarda muraǵat ashý máselesi kún tártibine qoıyldy. 1933 jyly Áýlıeata, Jýaly, Qordaı, Merki, Shý aýdandarynda muraǵattar qurý týraly buıryqqa qol qoıyldy. Keıinnen aýdandyq muraǵattar Áýlıeatadaǵy aýdanaralyq muraǵat bıýrosyna bekitildi.

Negizinen óńirdegi muraǵattandyrý isi ótken ǵasyrdyń ekinshi onjyldyǵynda bastalǵanymen bul jumysta birizdilik bolmaǵan. Keıinnen muraǵattyq málimetter aýdandyq atqarý komıtetiniń jemis-jıdek, astyq saqtaýǵa arnalǵan jertólelerinde saqtalyp kelgendigi de áshkerelendi. Tipti bastapqyda aýdandyq muraǵattardyń materıaldyq-tehnıkalyq bazasy 1 ústel men 1 oryndyq jáne sııa saýytynan turǵandyǵy týraly da derekter aıtylady. Alǵashynda muraǵatshy qyzmetin aýdandyq atqarý komıtetiniń mashınıstkalarynyń atqarýy da bul salaǵa áý basta tıisti kóńil bólinbegendigin aıǵaqtaıdy.

Alaıda arada ótken 80 jyl Qazaqstandaǵy arhıv salasymen birgen Jambyldaǵy muraǵattandyrý isine sony serpilis ákeldi. О́tken jyly Elbasynyń «Uly Dalanyń jeti qyry» maqalasynda bul salaǵa arnaıy kóńil bólinip, «Arhıv-2025» memlekettik baǵdarlamasynyń qolǵa alynatyndyǵy aıtylady. Qazir oblystaǵy arhıv qyzmeti sıfrlandyrý júıesine kóshe bastady. Sáıkesinshe bul júıe jergilikti turǵyndardyń arhıv salasyndaǵy suranysyn jedel óteýge jol ashty.