Mektep formasy biryńǵaı bolý qajet

Jambyl oblysy, Baızaq aýdanyndaǵy Y.Altynsarın orta mektebinde «Mektep formasy: ózekti máseleler» taqyrybynda ashyq áńgime otyrysy ótti, dep jazady Qamshy.kz aqparat agenttigi. 

Jasyratyny joq, búginde Bilim jáne ǵylym mınıstrliginiń mektep formasyna qoıylatyn talaptary qoǵamdyq pikirge birshama qozǵaý salyp otyr. Mektep formasy «Bilim týraly» zań men arnaıy buıryqta «dinı atrıbýttar qoldanylmaıdy» degen talap qoıylǵan. Osyǵan sáıkes biryńǵaı mektep formasyn engizý qarastyrylǵan. Degenmen óńirdegi keıbir mektepterde oqýshy qyzdardyń oǵan boı usynbaı, hıdjab kıip jatqandary kezdesedi.

Basqosýǵa aýdandyq bilim bóliminiń mamandary, aqsaqaldar keńesiniń, qamqorshylar keńesiniń músheleri, ata-analar komıtetiniń tóraıymdary, quqyq qorǵaý organdarynyń ókilderi men qoǵamdyq birlestik tóraǵalary qatysty. Sharada alǵash bolyp sóz tizgindegen aýdandyq bilim bóliminiń ádiskeri Indıra Spanalıeva urpaq tárbıesinde mektep formasynyń alatyn orny erekshe ekendigine toqtaldy. Sondaı-aq ol ótken oqý jylynda aýdanda mekteptiń ishki jarǵylaryn 10 oqýshy saqtamastan hıdjab kıgenin jetkizdi. Deıturǵanmen sala mamandarynyń jumystarynyń nátıjesinde olardyń 1-i jekemenshik mektepke, 4-i Reseıge qonys aýdarsa, qalǵandary biryńǵaı mektep formasyn kıipti.

– Qazaqstan Respýblıkasynyń Bilim jáne Ǵylym mınıstrligi orta bilim berý uıymdary úshin mindetti mektep formasyna qoıylatyn talaptardy bekitý jónindegi buıryqty «durys» dep qabyldaımyz. Shyndyǵynda, birizdilikti mektep formasy bolýy talap etilýi tıis. О́ıtkeni, onyń da beretin tárbıelik máni zor. Balalardyń bir-birimen teń bolýyna, ózin oqýshy sezinýine, tııanaqtylyqqa, jaýapkershilik qasıetterge baýlıdy. Aýdanda mektep formasyna baılanysty ata-analarǵa eskertý hattary joldandy. Sondaı-aq aýdandyq gazette arnaıy aıdar ashylyp, onda mektep formasynyń qandaı bolýy kerektigi jóninde málimetter keltirilip otyrdy. Kóbine dinı atrıbýttary bar formalar erejege saı kelmeıtindigi belgili. Sonymen qatar kádimgi beldemshelerdiń qysqa bolýy da ózekti máselege aınalyp otyr. Bul turǵyda biz beldemshelerdiń tizeden 2 santımetr tómen bolýyn talap retinde qoıdyq, – deıdi I.Spanalıeva.

О́z kezeginde Y.Altynsarın atyndaǵy orta mekteptiń dırektory Qanatbek Baıtek bilim oshaǵynda dinı atrıbýttary bar mektep formasymen eki oqýshynyń kelgenin aıtyp, mamandardyń júıeli jumystarynyń arqasynda olar biryńǵaı mektep formasyna kóshkenin jetkizdi. Jalpy ol basqaratyn mektepte 824 oqýshy bilim alady eken. Jańa oqý jyly qarsańynda demeýshiler 40 oqýshyny mektep formasymen qamtamasyz etipti. Sondaı-aq aýdandyq qamqorshylar keńesiniń tóraıymy Elmıra Smaılova oqýshylardyń biryńǵaı forma kııýi qajettigine tilge tıek etti. Al oblystyq

«Aq jol» gazetiniń tilshisi Eset Dosaly ımandylyq syrt kelbetten emes júrekten bolatyndyǵyn alǵa tartyp, mektep tártibine baǵyný qajettigin basa aıtty. Jınalysqa arnaıy kelgen «Asyl Arman» ulttyq dástúr men ónerdi qoldaý» qoǵamdyq birlestiginiń tóraǵasy Rınat Nuraqbaev mektep formasynyń birizdiliktiń joǵalýynyń sebebin ulttyq tárbıeniń álsizdiginen ekenin aıtyp, salt-dástúr men mádenıetti urpaq boıyna sińirý qajettigin atap ótti.

Basqosýda sondaı-aq oblystyq din isteri basqarmasynyń ınspektory Arman Sársenbaev oqýshynyń mektepke kelgendegi basty maqsaty bilim alý ekendigin jáne bilim oshaǵynyń ishki tártipterine baǵyný qajettigine toqtalsa, aýdandyq ıývenaldyq polısııa bóliminiń ókili Meıirbek Júnisbekov ata-analar Zańǵa baǵynbasa ákimshilik jaýapkershilikke tartylatynyn basa aıtty.