"Bastaý" jobasynyń jańa kezeńi bastaldy

«Atameken» kásipkerler palatasy tarapynan qolǵa alynyp jatqan qarjylaı jáne qarjylaı emes qoldaýlar óz jemisin berip keledi. Solardyń biri – «Bastaý» jobasy. «Bastaý» bastalǵaly oblysta 4070 adam kásipkerlik negizderi kýrsynan ótip, olardyń 2363 óz kásibin ashýyna múmkindik aldy. Jaqynda osy baǵdarlama boıynsha jańa oqý kezeńi bastalyp, oǵan úmitkerler jınaldy. Bul jóninde oblystyq kásipkerler palatasynyń baspasóz qyzmeti habarlady.

Jobaǵa ózin-ózi jumyspen qamtyp otyrǵan jáne jumyspen qamtý ortalyǵynda tirkelse de tirkelmese de jumyssyz júrgen azamattar qatysa alady. Oqýǵa qatysqan azamattar kásipkerlik negizderi boıynsha biliktilikterin jetildirýmen qatar ózderiniń bıznes-josparlaryn ázirlep shyǵady. Oqýdy sátti aıaqtaǵan soń bıznes-josparlaryn óńirdegi qarjy ınstıtýttary: «Aýyl sharýashylyǵyn qarjylaı qoldaý qory» aksıonerlik qoǵamy oblystyq fılıaly men «Atameken Taraz» jaýapkershiligi shekteýli seriktestigine usyna alady. Bul jobalar ómirsheń dep tanylsa atalmysh qarjy uıymdary 6 paıyzben 8000 aılyq eseptik kórsetkishke (bıylǵy jylǵy kórsetkishpen 20 200 000 teńge) deıin nesıe ala alady. Oqý aqysyn memleket óteıdi jáne qatysýshylarǵa stıpendııa tólenedi.

– Oqý prosesiniń jalpy merzimi – 20 jumys kúni. Oqý kezinde trenerler jekelegen keńester berip, óz jobańdy qarjylandyrý uıymdarynyń aldynda sátti qorǵap shyǵýyńyz úshin kópshilik aldynda sóıleý mánerine baýlıdy. Oqýdy aıaqtaǵan soń joba qatysýshylaryna sertıfıkattar beriledi. Sertıfıkat eki túrli bolady. Aýdandyq, oblystyq komıssııa aldynda bıznes-jobasyn sátti qorǵaı alǵan jaǵdaıda jobany bitirgendigi jóninde, al ekinshisi – komıssııa aldynda jobasyn qorǵaı almaǵan jaǵdaıda oqýǵa qatysqandyǵy jóninde beriletin sertıfıkat. Oqýdan 3 kúnnen artyq qalýǵa bolmaıdy. Oqýdan sebepsiz qalǵan azamattar komıssııanyń sheshimimen shyǵarylady. Oqýdy bitirip, sertıfıkat alǵan soń 1 jolǵy sertıfıkat beriledi. Ol sertıfıkat «Eńbek» nátıjeli jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan» baǵdarlamasy aıasynda nesıe rásimdeýge jáne 100 nemese 200 aılyq eseptik kórsetkish kóleminde grant alýǵa qajet ashady, – deıdi «Bastaý» jobasynyń oblystyq kásipkerler palatasynyń sarapshysy ári jobanyń úılestirýshisi Dana Eralıeva.

«Bastaý» jobasy «Nátıjeli jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan» baǵdarlamasynyń ekinshi baǵytyna kiredi. Bul jobaǵa qatysý úshin nıet bildirýshi azamat jumyspen qamtý ortalyǵyna nemese kásipkerler palatasynyń aýdandardaǵy fılıalyna, sondaı-aq ózi turatyn aýyldyq okrýg ákimshiligine ótinish bere alady. Nıet bildirýshiniń maqsatty topqa jatatyndyǵyn anyqtaıtyn – jumyspen qamtý ortalyǵy. Ortalyq tizimdi palatanyń fılıalyna ótkizedi. Odan ári palata atalmysh azamattardyń kásipkerlik áleýetin anyqtaý maqsatynda testten ótkizedi. Testten ótken azamattar jobanyń qatysýshysy atanady.