Jambylda "Rýhanı jańǵyrý" baǵdarlamasyn iske asyrýǵa 339 098 mektep oqýshysy men kolledj stýdenti qatysady

Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy qoǵam ómiriniń barlyq salasymen birge bilim berý isine de sony serpin ákelgeni jasyryn emes. Búginde jambyldyq oqýshylar Elbasy maqalasynan týyndaǵan «Týǵan el», «Týǵan jer» jobalary aıasynda «О́lketaný.Jambyl oblysy» kýrsyn oqyp, «О́z jerińdi tany» týrıstik ekskýrsııalaryna qatysýda , dep jazady Qamshy.kz aqparat agenttigi. 

Jahandaný zamany jastaryn patrıotızmge baýlýdyń birden bir tetigi Elbasy maqalasynan týyndaǵan «Týǵan el», «Týǵan jer» baǵdarlamalaryn nátıjeli iske asyrý ekeni belgili. Sáıkesinshe bul jobalardy bilim berý isinde qoldaný urpaq sanasynda týǵan el men jerge degen súıispenshilik sezimin darytýdyń jarqyn kórinisi bolmaq.

–О́tken jyly oblys mektepterinde oqıtyn 5-7 synyptar úshin Qazaqstan tarıhy, qazaq ádebıeti, geografııa, mýzyka pánderin tolyqtyratyn «О́lketaný. Jambyl oblysy» oqýlyǵy ázirlendi. Sáıkesinshe 2018-2019 oqý jylynyń III toqsanyn bastap bul oqýlyqpen óńir mektepteriniń 5,6,7 synyptarynda bilim alatyn 66 582 oqýshy qamtyldy, –deıdi oblys ákimdiginiń bilim basqarmasynyń basshysy Rahııa Turmaǵanbetova.

Bilim basqarmasynyń basshysy óz sózinde oqýshylarǵa týǵan ólke tarıhyn tanytýda murajaılar men mádenı-tarıhı oryndarǵa ekskýrsııalar uıymdastyrylyp jatqandyǵyn da tilge tıek etti.

–«О́z jerińdi tanyp bil» jobasy aıasynda bıyl 65 900 balaǵa týrıstik ekskýrsııalar uıymdastyryldy. Jazǵy maýsymda bul kórsetkish 81 myńǵa deıin ulǵaıady. Osynaý sharalarǵa kolledj oqytýshylary men oqytýshylary da belsene qatysýda. Atap aıtsaq, bilim salasynda «Rýhanı jańǵyrý» baǵdarlamalyq maqalasynan týyndaǵan mindetterin iske asyrýǵa 339 098 mektep oqýshysy men kolledj stýdentterin qamtymaq,–deıdi Rahııa Seıitbekqyzy.

Munan bólek oblys mektepteri men arnaýly orta bilim berý uıymdarynda «Oqy, tap» onlaın baıqaýy da ótkizildi. www.oqy,tap.kz saıtynda úsh kezeń boıynsha uıymdastyrylǵan baıqaýǵa 3 myńǵa jýyq oqýshy nıet bildirgen. Úsh kezeńnen turǵan synnan olardyń jeteýi úzdik shyǵyp, «Baldáýren» saýyqtyrý ortalyǵyna demalys joldamasyn jeńip aldy. Sol sekildi beıne-chellendj baıqaýlary da oqýshylardyń týǵan ólke tarıhyna qyzyǵýshylyǵyn arttyryp, onyń qadir-qasıetin baǵalaı bilýge shaqyrdy.