Toqaev AQSh-qa bardy

Memleket basshysy Qasym-Jomart Toqaevtyń Amerıka Qurama shtattaryna jumys sapary bastaldy. Prezıdent Nıý-Iorkte 23-25 qyrkúıek aralyǵynda ótetin Birikken ulttar uıymy Bas assambleıasynyń 74-sessııasyna qatysady, dep habarlaıdy Qamshy.kz aqparat agenttigi.

Nur-Sultannan ushyp shyqqan nómiri birinshi bort álemdegi qarjy jáne saıası ortalyqtardyń biri Nıý-Iorkke kesteden keshikpeı qondy, dep jazady 24.kz. Sapar 5 kúnge jalǵasady dep josparlanyp otyr. Onyń aıasynda kóptegen shet memleketterdiń basshylarymen eki jaqty kezdesýler ótedi. Alǵashqylary elorda ýaqyty boıynsha búgin keshki saǵat 11-de bastalady.

QR Prezıdentiniń baspasóz hatshysy Berik Ýálıdiń habarlaýynsha, Bas Assambleıanyń jumysyna 196 delegasııa, 100-ge jýyq memleket basshylary, BUU-ǵa múshe elderdiń 80-nen astam Úkimet jáne syrtqy saıasat vedomstvolarynyń jetekshileri qatysady.

"Osy mańyzdy sharanyń aıasynda 630 túrli kezdesýler ótedi dep josparlanýda. Memleket basshysy Bas Assambleıanyń Jalpy pikirsaıysynda baıandama jasaıdy. Bıyl atalǵan pikirsaıys "Kedeılikti joıý, sapaly bilim berýdi jáne klımatty saqtaý is-qımyldary men jan-jaqty tásilderdi ilgeriletý úshin kóp jaqty kúsh-jigerdi shoǵyrlandyrý" taqyrybynda ótedi", – dep jazady Berik Ýálı Ǵacebook paraqshasynda.

"Prezıdent turaqty damý máseleleri jónindegi joǵary deńgeıdegi saıası Forýmda sóz sóıleıdi. Budan bólek Qasym-Jomart Toqaevtyń BUU-nyń Bas hatshysy Antonıý Gýterrıshpen, birqatar memleket jáne Úkimet basshylarymen, halyqaralyq uıym jetekshilerimen, amerıkalyq bıznes jáne transulttyq kompanııa ókilderimen, AQSh-tyń saıası jáne sarapshy top múshelerimen kezdesýi josparlanǵan. Qazaqstan Prezıdentiniń BUU BA-nyń joǵary deńgeıdegi jıynyna qatysýy elimizdiń birqatar syrtqy saıası bastamalaryn ilgeriletýge baǵyttalǵan. Atap aıtqanda, qarýsyzdandyrý jáne ony taratpaý, bitimgershilik, terrorızmge qarsy áreket etý ustanymdary talqylanady. Sonymen birge keń aýqymdy halyqaralyq aýdıtorııanyń nazaryna ornyqty damý, azyq-túlik qaýipsizdigi, densaýlyq saqtaý jáne bilim berý júıesimen jappaı qamtý, qorshaǵan ortanyń azyp-tozýy syndy jahandyq kún tártibindegi ózekti máselelerge qatysty Qazaqstannyń kózqarasy usynylady", – dedi QR Prezıdentiniń baspasóz hatshysy.

Aıta keteıik, prezıdenttiń AQSh-qa kelýi qarsańynda amerıkalyq bedeldi basylym "The Hill" gazetinde onyń maqalasy jaryq kórdi. Maqalada elimizdiń ekonomıka men saıasattaǵy basym baǵyttary túsindirilip, osy sapardyń mańyzdylyǵy baıandalǵan.