"JAMBYL" telearnasynda-jańa jobalar

Bıyl irgetasy qalanǵanyna 30 jyl tolatyn «JAMBYL» telearnasy apta basynda jańa maýsymyn jańa leppen bastady. Irgetasy 1989 jyldyń 1 qarashasynda qalanǵan telearna – aımaqtyq fılıaldar arasynda aldyńǵy qatarda tur. Budan bólek, Jambyl oblystyq radıosy da bıyl bir ǵasyrlyq belesin atap ótpek. Iаǵnı, oblystyq radıonyń Áýlıeata óńirinen áýe tolqynynda aqparat taratqanyna 100 jyl tolyp otyr. Aıta ketý kerek, telearna ujymy jańa maýsymda Elbasy N.Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasy men Memleket basshysy Q.Toqaevtyń Qazaqstan halqyna Joldaýynan týyndaıtyn mindetterdiń iske asyrylý barysyn keńinen qamtýdy kózdep otyr.

Jergilikti arnanyń jańa jobalary jaıly kópshilikke fılıal dırektory Meıirjan Álibekulynyń ózi tanystyryp ótti.

– Tamyryn tereńge jaıǵan telearnanyń jańa maýsymy – jańa jobalarǵa toly. Túrli baǵyttaǵy 7 joba kórermen nazaryna usynylatyn bolady. Qaımaǵy buzylmaǵan qazaqy dástúr, qarapaıym eńbek adamdarynyń boıamasyz ómiri – «Týǵan meken» habarynda, el azamattarynyń parasatty pikiri, qarapaıym tirligi, ónegeli ómiri «8-qyr» baǵdarlamasynda, óńirdegi qasıetti jerler men eldi mekenderdiń tarıhy «8-aımaq» jobasynda kórinis tabady. Budan bólek, «Oılike» tok-shoýy, «Qalqan», «Syldyrmaq» sekildi belgili bir aýdıtorııaǵa arnalǵan baǵdarlamalar da kórermenge jol tartpaq. Al, aımaqtaǵy aqparatty jedel jetkizetin «Jańalyqtar» endi «JAMBYLnews» ataýymen tikeleı efırge shyqpaq. Jańa jobalardan bólek, kórermenge oı salar, sana-sezimderin rýhanı baıytýǵa serpin berer, aqıqattyń aldaspany Sherhan Murtazanyń jazbalar jınaǵy da jańa formatty kórermen nazaryna usynylady. «Tańǵy taım», «Túski taım» aqparatty-tanymdyq, sazdy baǵdarlamasy dúısenbi men juma aralyǵynda 1 saǵat boıy tikeleı efırde kórsetiledi. Kórermenmen keri baılanysty nyǵaıtýǵa baǵyttalǵan taǵy bir jańa joba – «Keshki taım» baǵdarlamasy da efırge shyǵarylý ústinde, – degen M.Álibekuly 30 jyldyq tarıhy bar telearnanyń osy ǵumyrynda talaı belesten ótip, táýelsizdikpen tuspa-tus kelgen qıyn-qystaý kezeńde aıaqqa turýyna bar kúsh-jigerin salǵan ardager telejýrnalıst aǵa-ápkelerine alǵysyn bildirdi.

Odan keıin sóz alǵan oblys ákiminiń orynbasary Sulýshash Qurmanbekova óz sózinde jańashyldyqqa umtylǵan ujymnyń jumysyna sáttilik tilep, aqparattyq saıasatty júrgizýde, Áýlıeata jańalyqtaryn jurtshylyqqa taratýda oblys basshylyǵy arna ujymymen tize qosyp jumys isteýge daıyn ekenin jetkizdi.

– Jańa maýsymmen qatar 30 jyldyq tarıhı belesti toılaǵaly otyrǵan telearna ujymyna sáttilik tileımiz. Osy qasıetti qarashańyraqtan qanatyn qataıtyp, túlep ushqan jerles jýrnalıster elimizdiń astanasy men ózge de qalalaryndaǵy oblystyq, respýblıkalyq arna ujymdarynda jemisti eńbek etip júr. Sondyqtan jambyldyq

telearna respýblıkalyq jýrnalıstıkanyń damýyna úlken úlesin qosyp otyr dep aıta alamyz. Bul arnanyń ǵana emes, aımaqtyń maqtanyshy deýge bolady, – dedi S.Qurmanbekova.

Al oblystyq máslıhattyń depýtaty, kezinde telearnanyń dırektor qyzmetin atqarǵan belgili jýrnalıst Meırambek Tólepbergen de arna ujymynyń, jas jýrnalısteriniń jyldan-jylǵa shyǵarmashylyq turǵydan shyńdalyp, jańa izdenis jolynda kele jatqanyna kóńil súısinetinin jetkizdi. Sondaı-aq, ol osy ujymnyń qalyptasyp, damýynda aıtarlyqtaı iz qaldyrǵan aǵa jýrnalısterdiń esimin jeke-jeke atap, sińirgen eńbegine toqtaldy.

Artynsha sóz tizgini tıgen elge tanymal jýrnalıst, otandyq televızııa ardageri Qalybek Atjan da kezinde ózi basqarǵan ujymǵa jemisti eńbek jolyn tilep, aq batasyn berdi.

Osy maýsymashar saltanatty sharanyń shyraıyn kirgizýde Kenen Ázirbaev atyndaǵy oblystyq fılarmonııanyń ónerpazdary baryn salyp, án men bıden, kúıden shashý shashty.