"SýperFarm" - Jambyl medısınasyna jańa serpin

Ekonomıkany ártaraptandyrý jáne shıkizat eksportyna táýeldilikti azaıtý úshin ındýstrııalandyrý baǵytyndaǵy baǵdarlamalarǵa barynsha basymdyq berý qajet ekeni belgili. Sondyqtan, bıyl ındýstrııalyq-ınnovasııalyq damý baǵdarlamasy aıasynda kásipkerlikti damytý kartasyna 2 joba engizýdi josparlanǵan. Sonyń ishinde Jambyl oblysy Jambyl aýdany Aıshabıbi aýyldyq okrýgindegi «SýperFarm» JShS-niń «Bir rettik medısınalyq buıymdar shyǵaratyn zaýytynyń kólemin keńeıtý» qurylysyn iske asyrý jobasynyń quny shamamen 3,5 mıllıard teńgege jýyqtaıdy dep jazady Qamshy.kz aqparat agenttigi. 

Jer kólemi – 1,5 gektar. Joba júzege asqanda 250 adam jumyspen qamtylatyn bolady. Qazir qurylys-montaj jumystary júrgizilýde. Qarasha aıynda tolyq paıdalanýǵa beriledi dep kútilýde. Joba búginde oblystyń ındýstrııalandyrý kartasyna engizildi.

Qysy-jazy eńbektenýdi qajet etetin, beınetine saı tabysqa jeteleıtin negizgi salanyń biri – aýyl sharýashylyǵy. Bul salaǵa toqtalsaq óńirde 2 389 agroqurylym jumys júrgizýde. Onyń ishinde 3 óndiristik kooperatıv, 25 aýylsharýashylyq kooperatıvi jáne 2 361 sharýa qojalyǵy bar. Olardyń óniminiń jalpy shyǵarylymy – 9 mıllıard 249,7 mıllıon teńge. О́tken jyldyń tıisti kezeńimen salystyrǵanda meje 116,7 paıyzdy qurap otyr. О́simdik sharýashylyǵy boıynsha 1 mıllıard 987,4 mıllıon teńgege ónim óndirildi. Al mal sharýashylyǵynda óndirilgen ónim kólemi 7 mıllıard 251 mıllıon teńgege jetti.

Qazirgi ýaqytta kún tártibine qoıylǵan basty máseleniń biri – jer ıgerý. Sebebi jer bos jatpaýy kerek. Máselen aýdannyń jalpy jer kólemi 430 954 gektardy quraıdy. Onyń ishinde aýyl sharýashylyǵy maqsatyndaǵy jerler 244 999 gektar. Eldi meken jerleri – 28 258 gektar. Jalpy egistik jerdiń kólemi 64 189 gektar, onyń ishinde aýyl sharýashylyǵy maqsatyndaǵy paıdalanýǵa jaramdy egistik kólemi 59 163 gektar. 1 638 gektar kóp jyldyq ekpeler bolsa, 9452 gektar shabyndyq, 339 315 gektar jaıylymdyq, 16 360 gektar bógde jer ýchaskeleri. Sońǵy eki jyl kóleminde 8 805,05 gektar jer memlekettik jer qoryna alynyp, 7 866,5 gektar jer konkýrs arqyly qaıta aınalymǵa qosyldy. Bul baǵytta da júrgizilgen jumys jandaný ústinde.

Qazaq mal sharýashylyǵyna erteden beıim halyq. Ata kásipti arda tutqan aýyldyqtar bul salanyń damýyna eseli eńbegimen úles qosýda. Sonyń arqasynda bıyl mal múıizdi iri qara sany 44 806-ǵa jetti. Qoı-eshki – 250 631 bolsa, jylqy – 19 244. túıe – 118, úı qustarynyń – 343 533-ti qurady. Aýdan kóleminde 6 370 basqa arnalǵan 13 mal bordaqylaý alańdary jáne 14 taýarly sút fermalary bar. Osy jyly 23 974,4 tonna sút, tiri salmaqta 4 489,2 tonna jáne soıys salmaqta 2 468,5 tonna et, 40 036,6 myń dana jumyrtqa óndirildi. 2018 jyldyń tıisti kezeńimen salystyrǵanda sút 102,9 paıyzǵa, et 105,2 paıyzǵa, jumyrtqa 116,2 paıyzǵa oryndaldy.