Qorlan balýan kúmis júldemen oraldy

Elimizdiń astanasy Nur-Sultan qalasynda ótken aptadan beri birneshe kúres túrlerinen álem chempıonaty ótip jatqany belgili. Sonyń biri-grek-rım kúresi. Osy kúres túri boıynsha ulttyq qurama sapynda Moıynqum aýdanynyń balýandary da el namysyn qorǵaýda. Onyń biri Qarabóget aýylynyń týmasy Qorlan Qanatuly bolsa, ekinshisi ulanbeldik Ashat Dinmuhamedov dep jazady Qamshy.kz aqparat agenttigi.  Atalǵan qos balýan da buǵan deıin álem, Azııa chempıonattarynda júldeli orynnan kórinip júrgenin el jaqsy biledi. Ashat Olımpıada oıyndaryna da qatysyp, sheberligin shyńdasa, Qorlan Azııanyń kúmis júldegeri.

Astanada ótip jatqan álem chempıonatynda Qorlan Qanatuly 55 keli salmaqta bozkilemge kóterilip, aqtyq aınalymǵa deıin qarsylastaryn qoǵasha japyrdy. Alaıda fınalda sáttálik joldas bolmaı, Grýzııa eliniń balýanyna ese jiberip qoıdy. Dese de bul biz úshin altynǵa bergisiz júlde. Sondyqtan Qorlannyń alatyn qamaly áli alda dep senemiz.

«Men aqtyq aıqasta sál asyǵystyq jasadym. Sonym durys bolmady»-dedi Qorlan jýrnalısterge bergen suhbatynda. Alaıda onyń jartylaı fınalda 2018 jylǵy álem chempıony ázerbaıjandyq balýandy oısyrata utqany el esinde qaldy. Bálkim osy kezdesýde ol kóp kúsh jumsap qoıdy ma degen oıda keledi. Qorlan egizdiń syńary. Onyń ekinshi syńary Baǵlan da kúres sportymen aınalysyp, úlken jetistikterge jetip júrgen jampoz.

Al moıynqumdyq ekinshi balýan Ashat Dinmuhamedov bolsa, ázirge úsh qarsylasyn tize búktirip, aıdy aspannan shyǵaryp otyr. Ol ásirese Reseı eliniń Olımpıada chempıonyn tuqyrta utyp, jerlesterin bir qýantty. Onyń aldaǵy jekpe –jekterinde de jeńiske jetip, altyn medalǵa qol jetkizýin tileımiz. Boz kilemde Ashatty tek jeńis tuǵyrynan kóreıik.

Iá, keıingi jyldary jambyldyq jampozdar álemdik eranalarda atoı salyp ǵana qoımaı, tórtkúl álemdi talanttarymen tánti qylýda. Ásirese shalǵaı aýyldardan shyqqan jastar jarystarda jasyndaı jarqyldap, júzden júırik shyǵyp jatyr. Shyndyǵyna kelgende alystaǵy Moıynqum eldi mekeninde aýyldar bylaı tursyn, aýdan ortalyǵynda jastardyń sportpen shuǵyldanýyna barlyq jasalǵan deı almaısyz. Mine osyndaı jaıtqa qaramastan jalyndy jastarymyz top jaryp kelip jatqany sózsiz qýantady. Bul Jambyl sportynyń juldyzy árkez jaryq ekenin taǵy bir aıǵaqtap turǵandaı.