Úkimet delegattary Abaı elinde

 

Jıdebaıda ornalasqan Abaıdyń murajaı-úıin, memorıal-keshende atqarylyp jatqan jumystyń barysyn saralap, 175 jyldyq mereıtoıǵa oraı josparlanǵan is-sharalar aýqymy men oryndalý barysyn talqylady.  

 

Abaıdyń murasy – eldiń basty rýhanı qazynasy. «Dúbirli toıdyń basty maqsaty at shaptyryp, kıiz tigý emes, urpaqtyń sanasyna aqynnyń murasyn sińirý, mán-maǵynasyn jetkizý kerek» degen Berdibek Saparbaev tarıhta qalatyn taǵylymdy isterdi jasaý qajettiligin basa aıtty. 

 

–  Memleket basshysy Qasym-Jomart Toqaevtyń tapsyrmasyna saı, dara aqynymyz Abaı Qunanbaıulynyń týǵan jeri álemniń ár túkpirinen keletin azamattardy qarsy alýǵa saqadaı saı bolýy kerek. Iri týrıstik ortalyqqa aınalýy tıis. Qazirgi tańda oblys basshylyǵy tarapynan jospardy júzege asyrý baǵytynda tıisti jumystar bastalyp ketti. Bul mereıtoıdyń maǵynasyn alar bolsaq, urpaqqa berer ónegesi mol. Sondyqtan tarıhı mańyzdy sharalarǵa basymdyq bere otyryp, salıqaly deńgeıde ótkizýge tıispiz, – dedi Saparbaev.  

 

Osy rette aıta ketý kerek, keler jyly Aqshoqyda ornalasqan áýlet qorymynyń qasynan Qunanbaı О́skenbaıulyna arnalǵan mýzeı salynady. Ondaǵy maqsat – tarıhtaǵy Qunanbaıdyń shynaıy obrazyn ashý, Abaıdyń tulǵa bolyp qalyptasý jolyndaǵy róliniń mańyzdylyǵyn jetkizý. 

 

Jalpy mereıtoıǵa oraı ShQO-da halyqaralyq, respýblıkalyq, oblystyq jáne aýdandyq deńgeıdegi jalpy sany 330-astam aýqymdy is-sharalar jospary bekitilgen. Olardy júzege asyrýǵa 880 mln. teńge jumsalady. Mereıtoıǵa oraı aýdan ortalyǵynda jańa bilim shańyraǵy boı kóteredi. Aımaq basshysy Danıal Ahmetovtiń aıtýynsha, aýyz sý máselesi, aýdanaralyq joldardy jóndeý, Abaı eliniń ál-aýhatyn arttyrýǵa baǵyttalǵan basqa da jumystarǵa 4 mlrd. jýyq qarajat bólinedi.