Kekilbaev turǵan úıge eskertkish taqta ornatyldy

Ábish Kekilbaevtyń 80 jyldyǵyna arnalǵan sharalar jazýshynyń kezinde turǵan úıine ornatylǵan memorıaldyq taqtanyń ashylý rásimimen jalǵasty. Taqta Medeý aýdany Nazarbaev kóshesindegi 118-úıdiń shyǵys jaǵyna ilingen.

Almaty qalasy ákiminiń orynbasary Erjan Babaqumarov memorıaldyq taqtanyń bolashaq urpaqqa máńgilik eskertkish ekenin aıtty.

– Qurmetti aǵaıyn, qadirli qaýym! Barshańyzdy kórnekti qoǵam qaıratkeri, qazaq ádebıetiniń klassıgi Ábish Kekilbaevtyń qurmetine arnalǵan memorıaldyq taqtanyń ashylýymen quttyqtaǵym keledi. Ábish aǵamyz óziniń shyǵarmalarymen qazaq ádebıetin jańa deńgeıge kóterdi. Tól ádebıettiń qalyptasýyna bar ǵumyryn arnap, óshpes iz qaldyrdy. Ultqa qyzmet etýdiń jarqyn úlgisin kórsetip, sarqylmas mol rýhanı mura qaldyrdy. Onyń tulǵalyq kelbeti jyldarmen jasaryp, ǵasyrdan ǵasyrǵa jalǵasyp, urpaǵymen, ultymen jalǵasa beredi. Onyń ónegeli ómiri men ǵıbratty ǵumyry halqymyzdyń esinde máńgi qalady. Qadirli qaýym, osyndaı ardaqty azamattarymyzdyń esimin urpaqqa jetkizý bizdiń paryzymyz. Ábish aǵamyzdyń arýaǵyna taǵzym etip, ornatylǵan memorıaldyq taqta bolashaq urpaqqa máńgilik estelik bolsyn, elimiz aman, otanymyzdyń mereıi arta bersin degim keledi, – dedi qala ákiminiń orynbasary.

Shara barysynda Qazaqstannyń halyq jazýshysy Ábdijámil Nurpeıisov, aqyn Esenǵalı Raýshanov Ábish Kekilbaev týraly estelikterimen bólisti. Aqyn Temirjan Medetpek jazýshy turǵan páter bolashaqta mýzeı úıge aınalar dep tilektestik bildirdi.