Almatyda "Ábish Kekilbaev" kóshesi ashyldy

Bıyl qazaqtyń klassık jazýshysy, memleket jáne qoǵam qaıratkeri Ábish Kekilbaevtyń týǵanyna 80 jyl. Mereıtoıdy atap ótý kórnekti qalamger ǵumyrynyń 40 jyly ótken, shyǵarmashylyq turǵyda shyńdalǵan, el súıip oqyǵan týyndylarynyń basym kópshiligi jazylǵan Almaty qalasynan bastaý aldy, dep habarlaıdy Qamshy.kz aqparat agenttigi.

Mereıtoılyq sharalar leginiń shymyldyǵy jazýshynyń esimi berilgen kósheniń saltanatty ashylý rásimimen túrildi. Burynǵy "Kablýkova" budan bylaı resmı túrde "Kekilbaev" kóshesi dep atalady.

Sharaǵa qala basshysy Baqytjan Saǵyntaev, jazýshynyń jary Klara Jumabaeva men týystary, qalamgerler men qala turǵyndary qatysty. Qala ákimi jınalǵandardy zańǵar jazýshynyń mereıtoıymen quttyqtaı otyryp, ıgi istiń Almatydan bastaý alýynyń mánine toqtaldy.

– Asa kórnekti jazýshy Ábish Kekilbaev ómiriniń baqytty da, maǵynaly shaqtaryn osy Almaty qalasynda ótkizdi. Jazýshylyq ónerdiń, shyǵarmashylyq sheberliktiń shyńyna shyqty. Memlekettik saıasat pen saıası sahnada jarqyndaı jarqyldap, sóz bastar sheshenge, oı bastar kósemge aınaldy. "Jaqsy bolýdyń jaqsylyq jasaýdan basqa joly joq" degen aǵamyzdyń sózinde de, shyǵarmashylyǵynda da jasandylyq bolǵan joq. Uly Muhtar Áýezovtan bata alǵan talantty tulǵa oıyn irikpeı aıtty, syryn búkpeı jazdy. Eline janyn salyp adal qyzmet etti. Ábish aǵamyzdyń shyǵarmalaryn oqı otyryp qazaq mádenıetiniń sanqyrly qatparyn jazbaı tanýǵa bolady. Qazaq ádebıetiniń klassıgin búkil qazaq halqy qadir tutty. Almaty qalasy jurtshylyǵy atynan osyndaǵy zııaly qaýymdy, qurmetti Klara apaı, ózińizdi, balalaryńyzdy búgingi kósheniń ashylýymen shyn júrikten quttyqtaımyn. Aǵanyń máńgilik ǵumyry bastaldy. Endigi jerde ol kisiniń esimin este qaldyrýǵa arnalǵan sharalar jasalatyn bolady, – dep atap ótti Baqytjan Ábdiruly.

Jazýshynyń jary Klara Jumabaeva Ábish Kekilbaev ómirinde óziniń týǵan jerinen keıin Almatyny erekshe jaqsy kórgenin aıtty.

– Ábish Almatyda 40 jyl ómir súrdi. Shyǵarmashylyq ómiriniń 40 jyly osynda ótti. "Úrker" men "Eleń-alań" syndy kóptegen shyǵarmalary osynda dúnıege keldi. Onyń qyzmeti, eńbegi el aldynda boldy. Ábishten erte aırylyp qalamyz dep oılamap edik, biraq onyń esimin ardaq tutyp, osyndaı jaqsylyqtar jasap jatqandaryńyzǵa kóp-kóp raqmetimizdi aıtamyz. Osy sharalardyń Almatydan bastalǵanyna erekshe qýanyshtymyn. Almaty jaınaı, jasaı bersin!, – dep Klara apamyz júrekjardy lebizin bildirdi.

Ábish Kekilbaevtyń 80 jyldyǵyna arnalǵan sharalar munymen bitpeıdi. Búgin jazýshy turǵan N.Nazarbaev dańǵyly 118 úıge eskertkish taqta qoıylyp, Abaı atyndaǵy Qazaq memlekettik akademııalyq opera jáne balet teatrynda merekelik kesh ótedi.