Jambyldyq jastar "Real Madrıdte" dop tebedi

Almaty qalasynda jetimder úıi men mektep-ınternattyń tárbıelenýshileri arasynda shaǵyn fýtboldan túndigin túrgen VII el chempıonatynan jerlesterimiz abyroımen oraldy. Týrnırde balǵyn fýtbolshylarymyz top jaryp ǵana qoımaı, ıspanııanyń ataqty «Real Madrıd» klýbymen tájirıbe almasý múmkindigine ıe bolyp otyr dep jazady Qamshy.kz aqparat agenttigi. Jalpy Almaty tórinde alaýy tutanǵan alamanǵa barlyq oblystardan 12 komanda qatysyp, baq synaǵan bolatyn. Mine, osy kil myqtynyń ishinen jerlesterimiz dara shyǵyp otyr.

«О́mirlik qıyn jaǵdaıdaǵy balalardy qoldaý» ortalyǵynyń «Tulpar» komandasy toptyq kezeńde eń aldymen pavlodarlyq «Ekibastuz» komandasyn tize búktirse, qaraǵandylyq «Qulynshaq» komandasymen 1:1 esebimen teń túsedi. Jigitterdi osy enshilegen upaı jartylaı fınalǵa alyp shyqqan. Aqtyq aınalymǵa aıaq attam jer qalǵanda jerlesterimiz jeńiske degen jiger tanytyp, týrnırdiń buǵan deıingi eki dúrkin chempıony qaraǵandylyq «Tańsholpan» komandasyn 1:0 esebimen tize búktiredi. Al fınalda qostanaılyq «Búrkit» komandasymen kúsh synasqan fýtbolshylarymyz 1:0 esebimen basym túsip, chempıondyq ataqty jeńip alady. «Altyn goldyń» avtory – Anatolıı Lıtvınov.

Endi jerlesterimiz qazan aıynyń aıaǵyna qaraı Ispanııa memleketine jol tartyp, ataqty «Real Madrıd» klýbynyń akademııasymen tanysady. Sondaı-aq jerlesterimiz koroldik klýbtyń jastar quramasymen joldastyq kezdesý ótkizedi dep kútilýde.

Árıne bul oblysymyz úshin úlken abyroı. «Tulpar» komandasynyń bapkeri Erbol Bektiǵulovtyń aıtýynsha, olar bul jeńisti kópten kútken eken.

- Jalpy biz el birinshiligine besinshi jyl qatarynan qatysyp otyrmyz. Buǵan deıin eki ret ekinshi oryn alǵan bolatynbyz. Bıyl mine aıymyz ońynan týyp, bas júldeni jeńip aldyq. Sondaı-aq Nıkolaı Damajerov esimdi oıynshymyz «Úzdik qorǵaýshy» nomınasııasyna ıe boldy.

Mundaı tolaıym tabysqa qol jetkizýimiz eń birinshi Alla, ekinshi «О́mirlik qıyn jaǵdaıdaǵy balalardy qoldaý» ortalyǵynyń dırektory Aıjan Meıirhanovanyń qoldaýynyń arqasy. Ol kisige komanda atynan aıtarym tek alǵys.

Endi buıyrtsa qazan aıynyń aıaǵyna qaraı Ispanııaǵa ushyp, sonda dańqty «Real Madrıd» klýbymen tájirıbe almasatyn bolamyz. Bul biz úshin úlken jaýypkershilik pen abyroı, -deıdi bapker.

Jalpy jeti jyldan beri atalǵan týrnırge uıytqy bolyp kele jatqan «BAURZHAN» qaıyrymdylyq qory. Al bas demeýshi «Samuryq-Qazyna» ulttyq ál-aýqat qory. Mine, osyndaı aıtýly alaman jas jetkinshekterge úlken sportqa jol ashyp, qanatyn qataıtyp jatqany qýantady.

Jaraısyńdar, jigitter!