Dopıng qoldanǵan sportshylar barlyǵynan qaǵylady

Búgin QR Parlamenti Májilisinde «QR Dene shynyqtyrý jáne sport týraly keıbir zańnamalyq aktilerine ózgertýler men tolyqtyrýlar engizý týraly» zań jobasynyń ekinshi tyńdalymy ótti, dep habarlaıdy Qamshy.kz aqparat agenttigi.

QR Mádenıet jáne sport mınıstrliginiń baspasóz qyzmeti taratqan málimetke saı, májilismender bir aýyzdan zań jobasyn qoldap QR Parlamenti Senatynyń qaraýyna jibergen.  Zań jobasyn ázirleýshi – Qazaqstan Respýblıkasynyń Mádenıet jáne sport mınıstrligi.

Zań jobasynyń negizgi maqsaty – qoldanystaǵy dene shynyqtyrý jáne sport salasyndaǵy zańnamany jetildirý, dopıngke qarsy erejelerdi qatańdatý, Ulttyq Dopıngke qarsy ortalyqtyń mártebesin kóterý.

Zań jobasynda dopıng qoldanǵan, ony qoldanýǵa májbúrlegen tulǵalarǵa qatysty ákimshilik jaýapkershilikti engizý qarastyrylǵan, onyń kólemi 200 aılyq eseptik kórsetkishti quraıdy.

Budan basqa, Zań jobasynda dopıngti qoldanǵany úshin:

– jarystan shettetý;

– jarystyń joıylǵan nátıjesi úshin aqshalaı yntalandyrýdy qaıtaryp alý;

– sportshylar men bapkerlerge ómir boıǵy aı saıynǵy materıaldyq qamsyzdandyrý tóleminen aıyrý;

– sport túrleri boıynsha Qazaqstan Respýblıkasy qurama komandasynyń múshelerine olardyń halyqaralyq sporttyq jarystarda sporttyq jaraqattar alýy jáne mertigýi kezinde ótemaqy tólemderinen aıyrý;

– sporttyq ataǵynan aıyrý;

– Olımpıada, Paralımpıada jáne Sýrdlımpıada oıyndarynyń chempıondary men júldegerlerine arnalǵan turǵyn úıden aıyrý;

– sportshylardy, bapkerlerdi sport túrleri boıynsha Qazaqstan Respýblıkasynyń qurama jáne shtattyq qurama komandalarynyń quramynan shyǵaryp tastaý kózdeledi.

Búgingi tańda QR qoldanystaǵy «Dene shynyqtyrý jáne sport týraly zańynda» Olımpıada, Paralımpıada, Sýrdlımpıada oıyndarynda altyn medal jeńip alǵan sportshylardyń menshigine úsh bólmeli, kúmis medal alǵan sportshyǵa eki bólmeli, qola medal ıegerine bir bólmeli páter berý qarastyrylǵan.

Zań jobasynda Olımpıada, Paralımpıada, Sýrdlımpıada jeńimpazdary men júldegerlerine baspanany 10 jyl merzimine deıin jalǵa berý, sonymen qatar, osy merzim ishinde ony quqyq menshik ıelegine aýdarýǵa tıym salynady, sebebi dopıng-testerdiń saqtalý merzimi 10 jyldy quraıdy.

Osy ýaqyt aralyǵynda saraptama quramynan dopıng tabylmasa, baspana sportshy menshigine ótedi. Eger Olımpıada, Paralımpıada, Sýrdlımpıada jeńimpazy ne júldegeri ómirden ótken jaǵdaıda, dopıng nátıjesiniń oń ne teristigine qaramastan, sportshy muragerleriniń atyna baspana qaıtarymsyz negizde beriledi.