Shetelden  avtokólik ákelý jáne ony tirkeý qansha turady?

Qazaqstanǵa kólik alyp kelý kezinde barlyq salyqtar men alymdardy tóleı otyryp, avtokólikti tirkeý men kedendik rásimdeýdiń qansha turatynyn 24.kz jazdy, dep habarlaıdy Qamshy.kz aqparat agenttigi. 

EAEO elderinen avtomobıl satyp alý, sonyń ishinde Armenııada rásimdeýdiń ońaı ári arzan bolýyna baılanysty búginde kóptegen qazaqstandyqtar shetelden kólik ákele bastady. Qazaqstanda mundaı avtomobılder satyp alýshylar kedendik baj salyǵy men basqa da tólemderdegi aıyrmashylyqty tóleýi qajet.

Sonymen, kópshilikke unaıtyn 2012 jyly AQSh-ta shyqqan, kólemi 2,5 bolatyn Toyota Camry kóligin alyp qaraıtyn bolsaq, avtokólik ekologııalyq sanatqa (Evro-4), sondaı-aq Qazaqstan Respýblıkasynda tirkeýge qoıylatyn basqa da talaptarǵa sáıkes keledi. Muhıttyń ar jaǵynda ony 8-9 myń dollarǵa satyp ala alasyz. Jetkizý quny taǵy 2500 dollar. Kedendik baj – 20 000 teńge nemese 52,05 dollar. Barlyǵy 10,552,05 dollardy quraıdy.

Qazaqstan Respýblıkasyndaǵy ımporttyq bajdar jyl saıyn birtindep tómendep keledi, sonyń ózinde aıtarlyqtaı qymbat. Jeti jyldan asqan Camry kóligin ákelý kedendik qunnyń 19%-yn quraıdy. Iаǵnı 19%-dy 10 552,05 dollardan eseptep shyǵarý kerek. Nátıjesinde tólem 2 004,89 dollardy quraıdy.

Sodan keıin qosymsha qun salyǵyn tóleýińiz kerek (avtomobıldiń kedendik qunynan 12% jáne kedendik baj, ıaǵnı 12% (10 552.05 + 2 004.89) = 1 506.83 dollar).  Qazaqstanda tirkelý úshin satyp alýshy qutqarý aqysyn da tóleýi kerek. Kólemi 2001-den 3000 tekshe/sm kólik úshin 500 AEK – 1,226,500 teńge nemese 3 285,85 dollar. Sondaı-aq dál osylaı bastapqy tirkeý jarnasy úsh jyldan asqan jeńil kólikter úshin 500 AEK – 1 262 500 teńge nemese 3 285,85 dollar.

Sonymen qatar Qazaqstan Respýblıkasynda tirkeýden buryn kólik quralynyń qaýipsizdik sertıfıkatyn alyp, attestasııalanǵan ornatý ortalyqtarynan kólikke EVAK tetigin ornatý qajet (50 000 teńge + 189 000 teńge = 239 000 teńge nemese 622.4 dollar).

Osylaısha kólemi 2,5 bolatyn segiz jyldyq Toyota Camry-di  tek kedendik rásimdeý men Qazaqstanda tirkeý 10 705,82 AQSh  dollar bolady. Bul kóliktiń ózinen qymbat. Jalpy alǵanda, jetkizip berý arqyly avtomobıl satyp alý 8 163 000 teńgege shyǵady.

Dınara Dospan