Semeılikter qala kúnin atap ótedi

Qala kúnin merekeleý baǵdarlamasy týraly Mádenıet jáne tilderdi damytý bóliminiń basshysy Nazerke Aqqojına baspasóz máslıhatynda baıandady, dep habarlaıdy Qamshy.kz aqparat agenttigi. 

Barlyq qalalyq murajaılar men kitaphanalarda qala tarıhy týraly kórmeler usynylady. Alaıda, negizgi is-sharalar 20-22 qyrkúıek aralyǵynda ótedi. Osy kúnderi ortalyqtandyrylǵan kitaphana júıesinde Book Dating formatynda shara ótip, sondaı-aq qalalyq mádenıet saraıynda aqyn Dúısenǵazy Nyǵmetjanovtyń kúıtabaǵy tanystyrylady. Sport  súıer qaýym fýtboldan ótetin jarysta bas qospaq. "Severnyı" saýda ortalyǵynda dástúrli aýylsharýashylyq ónimderiniń jármeńkesi ótedi.

22 qyrkúıek kúni mereke saǵat 11.00-de bastalyp, saǵat 23.00-deıin jalǵasatyn bolady. Meıram Abaı, Shákárim, Muhtar Áýezov, Álıhan Bókeıhanov jáne basqa da mańyzdy tulǵalar eskertkishterine gúl shoqtaryn qoıýmen bastalyp, ortalyq alańdaǵy aýqymdy sharalarmen qorytyndylanbaq.

– Qala kúninde ár túrli alańdar jumys isteıtin bolady. "Meıirimdi Semeı" balalar festıvali, retro avtokólikter sherýi syndy sharalar halyqqa usynylmaq. Sondaı-aq, bes taqyryptyq fotoaýmaqtyń bolatynyn da atap ótken jón. Kez kelgen nıet bildirýshi bul jerlerde  estelik sýretke túsire alady. Sondaı-aq, Smart-TV aımaǵy jumys istep, turǵyndar ártisterdi  tyńdap qana qoımaı, ózderi karaokede án aıtýǵa múmkindik alady.  Saǵat 19.00 bastap Qazaqstan estradasy juldyzdarynyń qatysýymen keshki konserttik baǵdarlama, merekelik otshashý  jáne semeılikterge arnalǵan bı keshi uıymdastyrylady.  Bul kúni qala ákimi jańa týǵan nárestelerdi, jas jubaılar men ardagerlerdi merekemen quttyqtaıdy, – dedi Nazerke Aqqojına.

Semeı qalasynyń aqparattyq ortalyǵy