Poıyz apatynan qaza bolǵan júrgizýshiniń anasy: "Balamdy kinálamasynshy"

Jantúrshigerlik temirjol apatynan shoshyp qalǵan Almaty oblysyndaǵy Shamalǵan beketiniń turǵyndary sheneýnikterden kópir salyp berýdi talap etti. Ondaǵan adam búgin eldimekendegi ákimdik ǵımaratynyń aldyna jınaldy. Olar apat bolǵan ótkelde saǵattap keptelip turýdan mezi bolǵanyn aıtady. Jurttyń muń-muqtajyn tyńdaǵan bılik ókilderi kópir turǵyzylatynyn málimdedi. Tek onyń naqty qashan jasalatyny belgisiz dep jazady Qamshy.kz aqparat agenttigi KTK arnasynyń deregin negizge alyp.

"О́tkelde árdaıym kólik keptelip turady. Balalarymyz tańerteń shyǵyp ketedi. Keshkisin balalarymyz úıge kirgenshe, 12-ge deıin bizge uıqy, tynyshtyq joq. Onyń ústine, qaýipti ótkelde qaıǵyly oqıǵa kóp bolady", - deıdi Shamalǵan beketiniń turǵyny Sáýle Esenǵalıeva.

Oqıǵa ornynda til tartpaı ketken qoǵamdyq kólik júrgizýshisiniń jaqyndary ol "jolaýshylardy qutqaramyn dep qurban boldy" dep esepteıdi.

"Meniń balamdy eshkim kinálamasynshy. Ol óziniń jumysyn atqardy ǵoı. Sol adamdar úshin ózin qurban etti ǵoı. Adamdardy túsiremin dep qaza boldy", - deıdi marqumnyń anasy Sımızar Sarakova.

Qara jamylǵandar eshkimge kiná artpaıdy. Sotqa da shaǵymdanbaq emes. Dese de, eldiń esin shyǵarǵan oqıǵaǵa kinálini tergeý anyqtaýy tıis.