«Mahabbat muńy» spektakli Nur-Sultan qalasynda sahnalandy

Qazaqstannyń  «Aq jol» Demokratııalyq Partııasy Mańǵystaý oblystyq fılıaly janyndaǵy «Aq jol-jastar» jastar qanatynyń áýesqoı ártisteri, «Rýhanı jańǵyrý» baǵdarlamasy aıasynda Ulttyq ádebıetimizge óshpes iz qaldyrǵan Tólegen Aıbergenovtyń  kemeńger tulǵasyn eske alyp, qazaq ádebıetiniń poezııasyna qomaqty úles qosqan qarymdy qalamgerdiń ádebı murasyn  nasıhattaý maqsatynda,   aqıyq aqyn óleńderimen órnektelgen Tahaýı Ahtanovtyń «Mahabbat muńy» atty lırıkalyq qoıylymyn  L.N. Gýmılev atyndaǵy Eýrazııa ulttyq ýnıversıtetinde sahnalady.

Spektaklge L.Gýmılev atyndaǵy EUÝ-niń áleýmettik jáne azamattyq damý departamentiniń dırektory Rústem Álqoja, «Aq jol» QDP MOF tóraǵasy Jańbyrbaı Jánibekuly, Tólegen Aıbergenov atyndaǵy №16 orta mektep ujymy, EUÝ-niń stýdentteri men Nur-Sultan qalasynyń turǵyndary qatysty.

Qoıylymda talant taǵdyry, óner adamdaryna artylar jaýapkershilik, mahabbat atty móldir sezimniń páktigi, jastardyń taǵdyr jolynda qabyldaǵan sheshimderiniń durystyǵy men burystyǵy, ómir atty úlken soqpaqtyń qyzyǵy men qıyndyǵy týraly sýretteldi.

Sonymen qatar, adam boıyndaǵy adaldyq pen aramdyq, dostyq pen satqyndyq týraly syr sherken spektakldiń ón boıynda Tólegen Aıbergenovtiń sózine jazylǵan ánderi men  óleńderi oqyldy.Bul spektakldi «Aq jol» jastary óziniń qyzyǵýshylyǵymen, áýesqoılyǵymen tabıǵı daryndylyǵymen somdady.

Spektakl sońynda, L.Gýmılev atyndaǵy EUÝ-niń Áleýmettik jáne azamattyq damý departamentiniń dırektory Rústem Álqoja jastardyń ónerine óz rızashylyǵymen alǵysyn aıtyp, ýnıversıtet atynan estelik syılyqtar men gúl shoqtaryn tabystady.