Turǵyndar turmysyn arnaıy joba tikteıdi

Turǵyndardyń turmysyn arttyrý – búgingi kúnniń basty talaby. Bul baǵytta óńirde qolǵa alynyp otyrǵan aýqymdy pılottyq jobany iske qosýǵa oblys saqadaı-saı. Bul týraly búgin Úkimettiń keńeıtilgen otyrysynda aımaq basshysy Asqar Myrzahmetov baıandady.

Ashyǵyn aıý kerek, aýyldy jerdegi halyqty jappaı jumyspen qamtýdyń birden bir joly – ol qosalqy sharýashylyqqa qoldaý kórsetip, damytý. Osy oraıda buǵan deıin habarlaǵanymyzdaı oblys ákiminiń ózi bastaǵan jumysshy top óńirdegi barlyq aýdan, aýyldyq eldimekenderge arnaıy baryp, 138 myń aýla tolyq zerdelengen bolatyn. Taldaý nátıjesi kórsetkendeı, salystyrmaly túrde turǵyndar qosalqy sharýashylyqty tıimdi tabys kózine aınaldyra almaı otyr. Sebep – tıisti uıymdastyrý jumystarynyń joqtyǵy.

Osy turǵyda zerdeleý barysynda turǵyndardyń usynystarymen halyqtyń turmysyn jaqsartýǵa baǵyttalǵan 5 baǵyt qarastyrylyp otyr. Olar: úı irgesindegi jáne aýyl syrtyndaǵy (paılyq) jerlerdi tıimdi paıdalaný, úı aýlasynda mal jáne qus ónimdiligin arttyrý, qosalqy sharýashylyqtardy jemisti júrgizýge qolbaılaý-máselelerdi kooperatıvter arqyly sheshý jáne aýyldaǵy shaǵyn jobalardy qarjylandyrý. Bul 5 baǵyt boıynsha jalpy quny 46,4 mıllıard teńge kóleminde 31 myńnan astam jobany iske asyrý múmkinshiligi anyqtalyp otyr. Nátıjesinde 131 myń otbasy nemese 600 myńnan astam adam aıyna ortasha eseppen 128 myń teńge kóleminde turaqty tabyspen qamtylyp, 68 myń turǵyn ózin-ózi jumyspen qamtyǵandar men jumyssyzdar jeke kásipkerge aınalady dep kútilýde. Sol sekildi, aýyl sharýashylyǵynyń jalpy ónimi 34 paıyzǵa ulǵaıyp, Sút pen etti qaıta óńdeý kásiporyndarynyń júktemesi 30 paıyzǵa artýy eseptelgen. Bul álbette jalpy jumystyń túpki tabysyna aınalmaq.

Áıtse de, á degennen pılottyq jobanyń jemistiligine kóz jetkizý úshin ári jumystyń úlgi-bastaýy retinde oblystyń on aýyldyq okrýgi tańdalyp alynyp otyr. Ol – josparly jumystyń alǵashqy kezeńi bolmaq. Asqar Isabekuly Úkimet basshysyna alǵashqy kezeńde atqarylar jumystardy jan-jaqty aqparlady. On aýyldyq okrýg boıynsha 7 myńnan astam aýla qamtylady desek, onda 1117 gektar úı irgesindegi jerler bar. Shara barysynda sol jerlerdi utymdy uqsatýdyń joldary naqty júzege aspaq. Baý-baqshalyqtyń tıimdiligin eseleýde jylyjaılardyń, mal sharýashylyǵyn kóterýde kooperatıvterdiń mańyzdylyǵy eskerilgen. Sondaı-aq, ol úshin sapaly tuqym, kóshet, tyńaıtqyshtardy taýyp, jetkizip berý, tipti, tapshy tehnıka men qajetti mamandarmen qamtý máselesi de ońynan tarqatylmaq. Aıta keteıik, zerdeleý barysynda mundaǵy ár aýyldyq okrýgtyń tabıǵaty, jeri, sýy eskerilgen. Naqty nátıjede ónimdiliktiń 2-4 ese ósimine qol jetkizý josparlanǵan. Pılottyq aýyldyq okrýgterde qosalqy sharýashylyqtan bólek 137 shaǵyn jobalardyń tizimi jasaqtalyp, júzege asyrýdyń jol-jobasy bekitilgen.

О́ńir basshysy jobany qarjylandyrý sharasy ákimdikke kredıt berý júıesimen «Eńbek» baǵdarlamasy aıasynda iske asyrý usynylatynyn aıtyp, ákimdik, ary qaraı senim Agenti arqyly 2,5 paıyzdyq nesıe retinde turǵyndardy, kooperatıvterdi qarjylandyratynyn jetkizdi. Búginde nesıe alýshylardyń alǵashqy bazasy túzilip úlgerilgen.

Jalpy, on aýyldyq okrýg boıynsha jobalardyń iske asýymen 7 myń otbasy nemese 35 myń adam kelesi jyldyń qorytyndysymen aıyna keminde 104 myń teńge (ósim 2,5 ese) tabyspen qamtamasyz etiledi dep kútilýde. 2229 ózin-ózi jumyspen qamtyǵandar men jumyssyzdar mindetti zeınetaqy, salyq jáne basqa da tólemderdi tóleıtin kásipkerlerge aınalmaq.

«Biz Jobany iske asyrýǵa daıynbyz. Ákimdikke qatysty barlyq uıymdastyrý pysyqtalǵan. Sonyń ishinde bıýdjettik ákimshi bolatyn aýyl sharýashylyq basqarmasynyń shtattyq sany 18 qyzmetkerge kóbeıtildi. Aýdan, aýyl ákimderiniń arnaıy jumys algorıtimi bekitildi, tıisti jumys toptary quryldy jáne jaýapty mamandar oqytyldy. Pılottyq aýyl okrýgterinde birneshe kezdesýler ótkizilip, kooperatıv tóraǵalary anyqtaldy»,-dedi óz sózinde oblys basshysy Asqar Myrzahmetov.

О́z kezeginde Premer-Mınıstr Asqar Mamın bul jobanyń mańyzdylyǵyn atap ótip, qoldaıtynyn bildirip, tıisti sheshimderdiń der kezinde rásimdelýin nazarǵa alatynyn jetkizdi. Jaýapty tulǵalarǵa pılottyq jobanyń mehanızmin uıymdastyrýdy tapsyrdy.