Jeti azamatqa Almaty qalasynyń Qurmetti turǵyny ataǵy berildi

Sondaı-aq, birqatar azamat "Eńbegi úshin" tósbelgisimen marapattaldy. Qala kúnin merekeleý Tuńǵysh Prezıdent saıabaǵynda ótti. Bıyl alǵash ret qala ákiminiń usynysymen qala máslıhaty birden jeti azamatqa qurmetti azamat ataǵyn berdi, dep habarlaıdy Qamshy.kz aqparat agenttigi. 

Osylaısha ár sala boıynsha megapolıstiń damýyna úles qosqan turǵyndardyń eńbegi elendi.

Almaty qalasynyń Qurmetti azamaty ataǵyna "Nur Otan" partııasy tóraǵasynyń birinshi orynbasary Baýyrjan Baıbek, halyq jazýshysy Ábdijámil Nurpeıisov, aqyn, ádebıettanýshy-jazýshy, qoǵamdyq-saıası qaıratker Oljas Súleımenov, balet ártisi, horeograf, memlekettik akademııalyq bı teatrynyń dırektory Bolat Aıýhanov, teatr jáne kıno akteri, rejısser Iýrıı Pomeransev, "Shıpa-Dent" stomatologııalyq klınıkasynyń dırektory Múslimbaı Daıyrbekov jáne QR UǴA akademıgi QR Ǵylym men tehnıkanyń eńbek sińirgen qaıratkeri, ekonomıka ǵylymdarynyń doktory Amanjol Qoshanov ıe boldy.

Sondaı-aq, B. Saǵyntaevtyń "Eńbegi úshin" tósbelgisimen marapattalǵandardyń arasynda №162 mekteptiń hımııa pániniń muǵalimi Tastan Sydyqbekov, trolleıbýs júrgizýshisi Nadejda Kırıchenko, Medeý aýdandyq polısııa ınspektory Dáýlet Qaıratov, Astana Group-tyń ıesi Nurlan Smaǵulov, "Kaspi Bank" Dırektorlar keńesiniń tóraǵasy Vıacheslav Kım jáne t.b bar. Halyq jazýshysy Ábdijámil Nurpeıisov Almaty qalasynyń Qurmetti azamaty ataǵyn qala ákimi Baqytjan Saǵyntaevtyń qolynan alý zor mártebe ekenin tilge tıek etip, barsha qaýymdy búgingi Qala kúnimen quttyqtady.

"Bul mártebeli ataqty meniń qalamgerligimdi burynnan baǵalap kelgen Baqytjan Saǵyntaevtyń qolynan alý meni eki ese qýantty", – dedi Á. Nurpeıisov.