Qazaqstanda emhanaǵa tirkeý naýqany eki aıǵa sozylady

15 qyrkúıekte Qazaqstanda halyqty emhanaǵa tirkeý naýqany bastaldy. Jyl saıyn ótkiziletin dástúrli kampanııa eki aıǵa sozylmaq. Bıyl tirkeý eGov elektrondy úkimet veb-portaly arqyly júrgiziledi. Tirkelý úshin elektrondy sıfrlyq qoltańba qajet. Bul týraly «Áleýmettik medısınalyq saqtandyrý qory» KEAQ Almaty qalalyq fılıaly dırektory Tileýhan Ábildaev habarlady, dep jazady almaty.gov.kz saıty.

Tirkeý prosesiniń avtomattandyrylýy azamattardy emhanaǵa «syrttaı» tirkeý faktileriniń aldyn alýǵa kómektesedi. Sonymen qatar, erkin tańdaý prınsıpi boıynsha azamat óziniń turǵylyqty jerindegi ákimshilik birlik aýmaǵyndaǵy emdeý mekemesiniń birine tirkele alady. Oblystyq jáne respýblıkalyq mańyzy bar qalalarda bir aýdan ishindegi emhanany tańdaýǵa bolady.

Tirkeý barysynda otbasylyq prınsıpke basymdyq beriledi. Iаǵnı, ata-anasy da, balalary da bir emhanaǵa tirkelgeni jón. Al, 18 jasqa tolmaǵandardy balanyń zańdy ókili tirkeı alady.

Emhana ózi qyzmet kórsetetin aımaqtan tys jerde turatyn azamattardy, sondaı-aq, bastapqy medısınalyq-sanıtarlyq kómek kórsetetin mekeme júktemesi shekten asyp ketken jaǵdaıda tirkeýden bas tartýy múmkin. Qoldanystaǵy normatıvterge sáıkes, ýchaskedegi jalpy praktıka dárigeri qaraıtyn pasıentter sany 1700-den aspaýy tıis.

«Qazirgi tańda qalada josparlanǵan 88 ýchaskeniń ornyna 131 ýchaske ashyldy. Sonymen ýchaskelerdiń jalpy sany 895-ke jetti. Nátıjesinde bir dárigerdiń júktemesi 1529 adamǵa deıin qysqardy», – dedi Almaty qalasy Qoǵamdyq densaýlyq basqarmasy bastyǵynyń orynbasary Ásel Bısenbaeva.

Eske salsaq, azamattar emhanany tirkeý naýqanynan basqa ýaqytta da aýystyra alady. Iаǵnı, basqa jerge qonys aýdarǵan jaǵdaıda jylyna bir ret, emdeý mekemesi qaıta qurylsa nemese Qormen kelisimshartty buzǵan jaǵdaıda basqa emdeý mekemesine tirkelýge bolady. Sonymen qatar, elimizde turatyn ár turǵyn jylyna bir ret ózi turatyn aýmaqtyq birlik sheńberinde emhana aýystyra alady.