Aqparattyq-túsindirý tobymen kezdesý ótti

Memleket basshysy Qasym-Jomart Toqaevtyń «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty Qazaqstan halqyna arnaǵan Joldaýy turǵyndardyń úlken qoldaýyna ıe bolǵany ras. Osy oraıda Joldaýdy nasıhattaý jumystary da jer-jerlerde pármen alyp, kópshilik bolyp talqylap, oı eleginen ótkizý Jambyl oblysynda da tolyqqandy júrýde.

Jýyrda «Nur Otan» partııasy Jambyl oblystyq fılıaly tóraǵasynyń birinshi orynbasary E.Manjýov bastaǵan oblystyq aqparattyq-túsindirý toby Qordaı aýdanynyń aktıvimen kezdesti. Aldymen jınalǵan qaýym aldyna shyqqan top múshesi, Taraz qalalyq qoǵamdyq keńestiń tóraǵasy Q.Bekbolatov Joldaýdaǵy ár baǵytqa meıilinshe toqtalyp, onyń maǵynasy, elge bereri men ondaǵy nyqtap berilgen tapsyrmalardyń iske asýy, sonyń ishinde partııanyń atqarar róli týrasynda baıandama jasap, bılik pen buqara arasyndaǵy ashyq dıalogtyń oryn alýy qazirgi zaman talaby ekenin atap ótti. Osydan keıin baıandamaǵa shyqqan oblys ákimdiginiń jerdiń paıdalanýy men qorǵalýyn baqylaý basqarmasy basshysynyń mindetin atqarýshy J.Ásembaev Joldaýdyń basym baǵyttary jaıynda sóz órbitti. Sonymen qatar, sózge shyqqandar arasynda aýdandyq qoǵamdyq keńestiń tóraıymy B.Qaramoldaeva, aýdandyq ardagerler keńesiniń tóraǵasy B.Álimbet turaqtylyq pen órkendeýdi negizge alǵan Joldaýdaǵy halyq kóńilinen shyqqan kóptegen máselelerdiń kóterilýin sóz etip, Prezıdenttiń áleýmettik jaǵdaıǵa asa nazar aýdarǵanyna rızashylyqtaryn bildirdi. Osydan keıin sóz alǵan aqparattyq-nasıhat tobynyń jetekshisi E.Manjýov zamanaýı tıimdi memleket, azamattardyń quqyǵy men qaýipsizdigin qamtamasyz etý, qarqyndy damyǵan jáne ınklıýzıvti ekonomıka, áleýmettik jańǵyrýdyń jańa kezeńi, qýatty óńir – qýatty el dep atalatyn bes basym baǵytty qamtı otyryp, elimizdiń áleýmettik-ekonomıkalyq damýynyń alǵysharttaryn keńinen túsindirip qana qoımaı, Joldaýdyń astaryna da mán berý qajettigin aıtyp, ony naqty mysaldarmen keltirip berdi. Sonymen qatar, baıandamashy Joldaýdaǵy partııanyń róline jekeleı toqtalyp, osy rette ózge partııalarǵa mol múmkindikter beriletindigin, nasıhattaý jumystarynda bastaýysh partııa uıymdaryna birqatar tapsyrmalardyń júkteletinin jáne «Nur Otan» partııasynyń sannan sapaǵa kóshýi týrasynda keńinen áńgimeledi. Jıyn sońynda sóz alǵan aýdan ákiminiń ýaqytsha mindetin atqarýshy E.Orynbaev Joldaýdaǵy basym baǵyttar boıynsha aýdanda atqarylatyn jumystar jaıyna toqtalyp, aldaǵy josparlarmen bólisip, jumysshy top múshelerine alǵysyn aıtty.

Osydan keıin aqparattyq-nasıhat tobynyń músheleri aýdandyq ortalyq aýrýhananyń májilis zalynda medısına qyzmetkerlerimen kezdesip, nasıhat jumystaryn júrgizdi. Aqparattyq top músheleri odan keıin Áljan ana aýylynda bolyp, mádenıet úıinde aýyl turǵyndarymen kezdesip, Memleket basshysynyń «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» dep atalǵan Joldaýdyń jaıyn nasıhattap, turǵyndar tarapynan túsken suraqtarǵa jaýap berdi.

Osy rette taǵy bir aıta keterligi, aqparattyq-nasıhat tobynyń ózge músheleri osy kúni Stepnoe, Sarybulaq, Betqaınar, Qaqpatas jáne Jambyl aýyldarynyń turǵyndarymen kezdesip, Prezıdent Joldaýyn birge talqylady.