Shamalǵandaǵy narazy halyq: Kartada bar kópirdi qashan salady? (vıdeo)

Qyrkúıektiń 16-syna qaraǵan túni Shamalǵan stansııasyna ondaǵan adam jınalyp, jergilikti bılikten avtobýs pen poıyz joly túıisken tusqa kópir salýdy talap etti dep habarlaıdy Qamshy.kz aqparat agenttigi Azattyq radıosyna silteme jasap. 

Oqıǵa ornynda bolǵan Azattyq tilshisiniń habarlaýynsha, turǵyndar "mundaı oqıǵa birinshi ret bolyp otyrǵan joq, kópirge bólingen aqsha jelinip qoıdy" dep ashýlanyp, "Kópir! Kópir!" dep aıǵaılady.

- 11 jyldan beri ylǵı kóretinimiz osy. Azanda da sol, keshke de sol. Jumysqa bararda, jumystan qaıtarda eki-úsh saǵattap turamyz. "Kópir kartada bar" dep aıtady. Uzaq jolǵa júretin júrgizýshiler kartadan kóredi de osynda keledi, biraq kópir joq. Eger kelispese, kún saıyn keshki 17.00 men 21.00 arasynda poıyzdy toqtatsyn. Biz úıimizge ótip alaıyq. Odan keıin júrgize bersin. Kún saıyn júz poıyz ótedi. Qanshama adam ólip jatyr. Eger búgin demalys bolmaı, sabaq bolǵanda ne bolar edi? Saıajaıdan avtobýs-avtobýs oqýshy keledi. Bular solardyń ólimin kútip otyr ma? Júrgizýshi kináli deıdi. Ol qaıdan kináli bolsyn? Artynda da, aldynda da kólik boldy. О́zderińiz kórdińizder. Kópir salyp bersin! -dedi esimin Bolat Bókebaev dep tanystyrǵan Shamalǵan turǵyny.

Janyndaǵy turǵyndar ony qostady. "Kópir máselesin aıtqanymyzǵa qansha jyl boldy. Balalardy da basyp ketip jatyr" dedi turǵyndardyń biri. "Kópir salamyz dep júrgenderine jeti jyl boldy. 2017 jyly paıdalanýǵa beriledi dedi. Sol kópir qaıda?" dep aıǵaılady narazy azamattardyń biri.

Almaty oblysy Qarasaı aýdanynyń ákimi Jandarbek Dalabaev "kópirge aqsha bólingenbegenin, tek shemasy ǵana jasalǵanyn", óziniń bul qyzmetke bir jyl buryn ǵana kelgenin aıtyp, turǵyndardy sabyrǵa shaqyrdy. "Seısenbi kúni tańerteń kelińizder, máseleni talqylaıyq" degen usynys aıtty ol. Aqyrynda turǵyndar men bılik qyrkúıektiń 17-si kúni tańerteń aýdandyq ákimdik aldynda kezdesetin bolyp kelisip, tarasty.

Jol apaty jaıly alǵash habarlamalar paıda bolǵan kezde resmı oryndar apattan zardap shekkender týraly qarama-qaıshy aqparat taratty.

Áýel basta Almaty oblystyq ákimdiginiń baspasóz qyzmeti "apattan eki adam qaza tapty, 9 adam zardap shekti" dep habarlady. Izinshe bul aqparatty joqqa shyǵardy. Onyń sebebin Almaty oblystyq ákimdiginiń baspasóz hatshysy Ǵalymurat Júkel bylaı dep túsindirdi:

- Eki kólik eki adamnyń máıitin ákeldi. Bári jol apatynan qaıtys boldy degen. Onyń bireýin múlde basqa jol kólik oqıǵasynan jetkizgen bolyp shyqty. Ekinshisi - Shamalǵandaǵy apatta qaza bolǵan avtobýs júrgizýshisi. Al "9 adam zardap shekken" degenge kelsek, áýel basta 9 adamǵa medısınalyq kómek kórsetiledi degen. Biraq naqty úsheýi ǵana qazir aýrýhanada jatyr.

Buǵan qosa, soǵylǵan avtobýstaǵy jolaýshylar sanyna baılanysty da qarama-qaıshy derek boldy. Oblystyq tótenshe jaǵdaı departamenti Azattyq tilshisine avtobýsta 45 adam bolǵanyn aıtty. Al prezıdent Qasym-Jomart Toqaev Twitter-degi paraqshasynda avtobýsta 67 adam bolǵan dep jazdy.