Kaspııdiń bıoalýantúrliligin saqtaý boıynsha sharalar

«Teńizshevroıl» kompanııasy  «Gıdrobıologııa jáne ekologııa ınstıtýty» jáne «EkoMańǵystaý» uıymymen birlesip Kaspıı teńizindegi laqtyrylǵan aýlardy jınaý boıynsha jobany iske qospaq. Bul týraly joǵaryda atalǵan eki uıymnyń dırektory  - Mıirǵalı Baımuqanov pen Kırıll Osın málim etti.

-“Laqtyrylǵan aýlar balyqtardy qosa alǵanda, ıtbalyqtardyń, sondaı-aq teńiz jaǵalaýynda demalyp jatqan adamdardyń da ómirine qaýip tóndirýi múmkin. Osy qaýipti faktorlardy eskertýge jáne joıýǵa baǵyttalǵan sharany iske asyrý Kaspıı ıtbalyǵynyń popýlıasııasyn jáne jalpy teńizdegi  bıoalýantúrlilikti saqtaýda  paıda ákeledi dep kútilýde» – deıdi «Gıdrobıologııa jáne ekologııa ınstıtýtynyń» dırektory Mıirǵalı Baımuqanov.

Mamandardyń aıtýynsha, laqtyrylǵan aýlar men qoqystar ıtbalyqtardyń ólimine negizgi sebepshi faktorlardyń biri.  Tastalǵan aý qaldyqtary ıtbalyqtardyń denesine jabysyp, zaqym keltiredi, sońynda olardyń ólimine alyp keletin jaǵdaılar tirkelgen.  Buǵan 2015-2018 jyl aralyǵy  Kaspıı teńizindegi ıtbalyqtarǵa júrgizilgen zertteý barysy dálel. Monıtorıng ózge de qaldyqtardyń kóptep tastalynatynyn kórsetken. 

-«Joba  2019-2021 jyldar aralyǵy iske asyrylady. Osy ýaqyt aralyǵynda ÚEU komandasy men ózge de taraptar  teńiz sútqorektilerin qutqarýshylardy daıyndaý  kýrstaryna qatysyp, ıtbalyqtardy jáne bekire tuqymdas balyqtardy aýlardan qutqarý ádis-tásilderin úırenbek. Kaspıı teńiziniń jaǵalyq syzyǵyn jáne sý bóligin tazartý boıynsha keń naýqan ótkiziledi. Sondaı-aq, Kaspıı teńizi jaǵalaýynyń qazaqstandyq bóligine  monıtorıng jasaý, teńizdi laqtyrylǵan jáne ıesiz aýlardan tazartý úshin múddeli taraptarǵa jedel aqparat usyný, jaralanǵan ıtbalyqtarǵa sanaq júrgizý jáne olardy qorǵaý  jumystary da iske aspaq» -  deıdi mamandar.